Kólik quraldaryna avtobýs jolaqtarymen júrýge ruqsat berý jónindegi másele el arasynda kópten beri aıtylyp júr. Tipti bul Prezıdent deńgeıine deıin kóterildi. Byltyr Memleket basshysy da kólik júrgizýshilerine avtobýsqa arnalǵan jolaqpen júrýge ruqsat berý máselesin pysyqtap, bir sheshimge kelý qajettigin tapsyrǵan bolatyn. Prezıdenttiń aıtýynsha, avtobýstarǵa arnalǵan jolaqtardy qarbalas bolmaǵan kezde jáne demalys kúnderi paıdalanýǵa bolady. Mundaı tájirıbe Máskeý, Ystanbul men Parıjde keńinen qoldanylady. Osydan keıin Úkimet qaýlysynyń jobasy daıyndalyp, ol qujat Ashyq úkimet portalynda qoǵamnyń talqylaýyna usynyldy.
Al elorda ákimdigi jeke avtokólikterdiń Bus Lane jolaqtaryn paıdalaný jónindegi usynysty onlaın daýysqa saldy. Ákimdiktiń resmı saıtyndaǵy habarlamaǵa súıensek, daýys berýge 706 adam qatysqan, onyń 58%-y bul bastama qala kóshelerindegi ahýaldy nasharlatady dep sanasa, 41%-y qoldap shyqqan. Biraq qalalyq ákimdik «kópshiliktiń daýysyn» qoldaýdy jón kórgen sekildi. Olaı deıtinimiz, elordalyq ishki saıasat basqarmasynyń bizge jibergen aqparatynda tek bir sarapshynyń birjaqty pikiri ǵana berilipti.
CTS kompanııasynyń jol qozǵalysyn uıymdastyrý baǵytynyń jetekshisi Dýman Ysqaqov óz pikirin bylaı bildiripti: «Avtobýsqa bólingen jolaqty paıdalanbas buryn aldymen «qarbalas ýaqyt» degen qandaı ýaqyt ekenin anyqtap alýymyz qajet. Bul ózi – naqtylanbaǵan kezeń, onyń sońy belgisiz ýaqytqa deıin sozylýy múmkin. Mysaly, tańǵy qarbalas kezeń elordada tańǵy saǵat 7.30-dan bastalyp, saǵat 10.00-ge deıin sozylýy múmkin. Túski mezgilde kóshelerdegi keptelis saǵat 13.00-den 14.00-ge deıin bolady deımiz. Biraq keıbir joldarda bul ýaqyt 3-4 saǵatqa deıin jetýi múmkin. Al negizgi keptelis bolatyn keshki ýaqyttardy «qarbalas kezeń» saǵat 18.00-den bastalyp, keıbir kezde keshki 21.00 saǵatqa deıin sozylyp jatady. Sonda avtobýs jolaǵymen qaı ýaqytta jeke kólikter júredi dep boljaı alamyz?», deıdi ol.
Sarapshynyń aıtýynsha, Respýblıka, Bógenbaı batyr dańǵyly sekildi kóshelerde demalys kúnderi de únemi keptelis bolady. О́ıtkeni bul kóshelerde kóptegen saýda ortalyqtary, ártúrli bazarlar ornalasqan. Tek túngi mezgilde ǵana kólik aǵyny azaıady. Biraq kúndizgi ýaqytta kóshe kólikterden bosamaıdy. Sondyqtan D.Ysqaqov kólik quraldaryna Bus Lane jolaǵymen júrýge ruqsat etilse, bul jol-kólik oqıǵasyn tipten qıyndatyp, jaǵdaıdy ýshyqtyryp jiberetinin jetkizdi. Ári jolaýshylardy tasymaldaý múmkindigi de azaıa túsedi. О́ıtkeni jeke kólikten góri avtobýspen júretin adam qarasy kóp.
«Biz avtobýs jolaǵymen qoǵamdyq kólikter ǵana emes, jedel járdem sekildi arnaıy tehnıkalar, taksıler de júretinin umytpaýymyz kerek. Eger jaı kólikterge de osy jolmen júrýge ruqsat etsek, onda avtobýstar men arnaıy kólikterdiń kidirisi kóbeıedi. Onsyz da qalaǵa 400 avtobýs, 700 júrgizýshi jetpeıdi. Endi jeńil kólikter de Bus Lane jolaǵyna shyǵyp ketse, jaǵdaı ne bolady? Naǵyz keptelis sonda bolmaı ma? Avtobýstar dittegen jerine ýaqtyly jete almaıdy. Olardyń júrý ıntervaly kóbeıedi. Qazirdiń ózinde qat bolyp turǵan avtobýstar men júrgizýshilerge suranys tipten artady. Onyń syrtynda avtobýs jolaǵyn paıdalaný ýaqytynyń aıaqtalýy nemese bastalýy sııaqty kúrdeli máseleler bar, «jolaqty paıdalaný ýaqyttaryńyz aıaqtaldy» dep jolaqta turǵan kólikterdi bir mezette joldan shyǵara almaımyz ǵoı? Mine, osy sekildi máselelerdi eskergende avtobýsqa bólingen jolaqty jeke kólikterdiń paıdalanýy tıimsiz dep sanaımyn», deıdi sarapshy.
Jalpy elorda kóshelerine Bus Lane jolaǵy 2015 jyldan bastap engizilgen edi. Qazir onyń jalpy uzyndyǵy 74 shaqyrymǵa jýyqtap, 26 ýchaskege qoıyldy. Qalalyq ákimdiktiń habarlaýynsha, Bus Lane jobasy engizilgeli qoǵamdyq kólik qozǵalysynyń tıimdiligi 25%-ǵa jetip, onyń jol júrý ýaqyty orta eseppen 10 mınýtqa qysqarǵan. Mysaly, jolaýshylar avtobýsy 15 shaqyrym jolǵa orta eseppen 50 mınýtta jetse, Bus Lane jolaǵymen 40 mınýtta jetedi. Byltyr arnaıy jolaqtar Turan, Qabanbaı batyr, Uly dala, A.Baıtursynuly, J.Nájimedenov, Túrkistan, Q.Muhamedhanov jáne Abylaıhan kósheleri men dańǵyldarynyń 8 ýchaskesine engizilgen.
