Mınıstrdiń aıtýynsha, 2017-2021 jyldar aralyǵynda ishki gaz tutyný 4,8 mıllıard tekshe metrge, 13,8-den 18,6 mıllıard tekshe metrge deıin ósken. Sonymen birge onyń aıtýynsha, gaz tutynýdyń ortasha jyldyq ósimi shamamen jeti paıyz.
«Qazaqstanda 2025 jylǵa qaraı gaz tapshylyǵy bolýy múmkin. Alaıda taý-ken metallýrgııa kásiporyndary kómirden gazǵa belsendi kóshetin bolsa, onda tapshylyqtyń kólemi de ulǵaıady. Osy jaǵdaılarda eldiń resýrstyq bazasyn tolyqtyrý týraly másele týyndaıdy, ol úshin gazdy barlaý, óndirý jáne qaıta óńdeý sııaqty barlyq kezeńderde gaz jobalary úshin preferensııalar qajet. Sonymen qatar jer qoınaýyn paıdalanýshylar úshin ınvestorlardy yntalandyrý baǵasyn berý máselesi pysyqtalyp jatyr», dedi Aqsholaqov Senatta ótken Úkimet saǵatynda.
Mınıstr 2021 jyldyń qorytyndysy boıynsha shıki gaz óndirý 53,8 mıllıard tekshe metrge jetkenin aıtty. Onyń ishinde úsh iri jobanyń úlesine gaz óndirýdiń 81 paıyzy tıesili. Aqsholaqov atap ótkendeı, óndirilgen jalpy gazdyń 32 paıyzy qysymdy ustap turý úshin keri aıdaldy, 20 paıyzy jer qoınaýyn paıdalanýshylardyń óz qajettilikterine, elektr energııasyn óndirýge jáne kádege jaratýǵa paıdalanyldy, sondaı-aq 48 paıyzy taýarlyq gazǵa qaıta óńdeldi.
«2030 jylǵa qaraı boljamdyq derekterge sáıkes shıki gaz óndirý 87,1 mıllıard tekshe metrdi quraıdy, onyń ishinde úsh iri jobanyń óndirý úlesi 83 paıyz. Sonymen qatar óndirilgen 87,1 mıllıard tekshe metr gazdyń tek 42 mıllıard tekshe metri taýarlyq gazǵa qaıta óńdeletin bolady. Qalǵan gaz qaıtadan qabatqa aıdalady (47 paıyz) jáne óz muqtajdaryna paıdalanylady (15 paıyz). Qarashyǵanaq jobasy boıynsha óndiriletin gazdyń 19 mıllıard tekshe metriniń jartysyna jýyǵy qaıtadan qabatqa aıdalady», dep tolyqtyrdy vedomstvo basshysy.
Aqsholaqov Prezıdenttiń tapsyrmasy boıynsha sheteldik ınvestorlar Keńesimen birlesip jer qoınaýyn paıdalanýǵa arnalǵan jaqsartylǵan modeldik kelisimshartty ázirleý sheńberinde gazdy óndirý jáne óńdeý kezeńinde salyqtyq bosatý jáne basqa da yntalandyrý sharalary túrinde gaz jobalary úshin fıskaldyq preferensııalar kózdelgen.
Ol sondaı-aq elimizde gaz salasyn damytýdyń keshendi jospary ázirlengenin, onda perspektıvaly gaz ýchaskelerin damytýdyń birqatar is-sharasy kózdelgenin atap ótti.
