Aqmola oblysynyń et kombınaty ónimderin Reseı naryǵyna shyǵardy

Aqmola oblysynyń eń iri et kombınaty Kedendik odaq aıasynda jartylaı daıyn óniminiń birinshi partııasyn Reseı naryǵyna shyǵardy. Bul týraly 24.kz habarlady. Qazirgi tańda et kombınatynyń óndiristik qýaty 60 paıyz quraıdy. Aldaǵy jyly bul kórsetkishti 100 paıyzǵa jetkizý josparlanýda. Mekeme basshylyǵy kásiporynnyń Eýrazııalyq ekonomıkalyq qaýymdastyq elderi arasynda da básekege qabiletti ekenin aıtyp otyr. Aqmola oblysy Selınograd aýdanynda ornalasqan et kombınaty óz jumysyn 2010 jyly bastaǵan. Kún saıyn kásiporyn  5-ten 7 tonnaǵa deıin daıyn ónim shyǵarady. Munda et, shujyqpen qatar jartylaı ázirlengen ónimder de suryptalǵan. Olar barlyq halyqaralyq standarttarǵa saı jasalady. Germanııadan ákelingen jańa tehnologııalar kásiporynǵa joǵary sapaly ónimder shyǵarýǵa múmkindik beredi.«Biz maldy satyp alynǵannan keıin ony mindetti túrde dáriger qaraýynan ótkizemiz. Soǵym soıý halal standarty boıynsha júzege asyrylady. Biz «ekologııalyq taza ónim» dárejesine ıe boldyq», – deıdi et kombınaty dırektorynyń óndiris boıynsha orynbasary Túsipbek Bokın. Kásiporyn 100-den astam aýyl turǵyndaryn jumyspen qamtamasyz etip otyr. Olar sıyr, qoı men taýyq etin bólip, tazalap, suryptaıdy. Qyzmetine kirisýden buryn jumysshylardyń barlyǵy arnaıy tehnıka arqyly dezınfeksııalaýdan ótedi. Qazirgi tańda atalmysh kásiporyn Astana, Almaty, Qaraǵandy men Aqtaý qalalaryn óz ónimderimen qamtamasyz etýde. Mekeme basshylyǵy kelesi jyldan bastap ónimderin ózge de aımaqtarǵa jetkizýdi maqsat tutyp otyr. Aıdar О́risbaev. Derekkóz: 24.kz. Foto: Strategy2050.kz.