Aýdandyq Mádenıet úıinde ótken kezdesý barysynda aqparat salasyn damytý, azamattyq qoǵam, jastar jáne otbasy saıasaty, din, etnosaralyq qatynastar, qoǵamdyq sanany jańǵyrtý máseleleri talqylandy. Kezdesýge Almaty oblysy ákiminiń orynbasary B.Baıjumanov, Talǵar aýdanynyń ákimi Q.Ábdihanov, qoǵamdyq keńes músheleri, úkimettik emes uıymdar men etno-mádenı birlestikterdiń jetekshileri, aýdan turǵyndary men jastary qatysty.
– Elimizde azamattyq qoǵam ınstıtýttaryn damytý boıynsha úlken jumystar atqarylýda. Búgingi tańda respýblıka boıynsha áleýmettik mańyzdy jumystarmen aınalysatyn 22 myń úkimettik emes uıym bar. Memleket tarapynan barlyq úkimettik emes uıymdarǵa qoldaý kórsetilýde. Osy baǵyttaǵy jumystarǵa Almaty oblysynyń turǵyndary da belsendi úles qosýda, – dedi mınıstr A.Omarov.
Máselen, byltyr Almaty oblysynda memlekettik áleýmettik tapsyrys boıynsha 92 jobaǵa 199 mln teńge qarjy bólingen. Bıyl bul soma 495 mln teńgeni quraǵan. Buǵan 112 joba qatysatyn bolady. О́tken jylmen salystyrǵanda 2,5 esege ósim bary baıqalady. Árıne, bul is-sharalar azamattyq qoǵamdy damytýǵa serpin berip otyr. Osy jerde azamattyq qoǵamnyń qalyptasýy memlekettiń damýynda aıtarlyqtaı mańyzǵa ıe ekenine basymdyq berýi tıis. Sondyqtan da, mınıstr
aýdan turǵyndarymen kezdesýde oblystyq ákimdiktiń azamattyq qoǵamdy damytýǵa erekshe nazar aýdarýy qajettigin atap aıtty.
– Qazirgi ýaqytta qoǵamdyq keńester quramyn nyǵaıtý boıynsha jumystar júrgizilýde. Keıbir óńirler boıynsha mınıstrlik tarapynan syn bar. Biraq Almaty oblysy boıynsha kemshilik joq, – dedi mınıstr eriktiler qozǵalysyna da erekshe mán berilip jatqandyǵyn sóz etip.
Mınıstrliktiń mańyzdy jumys baǵytynyń biri – buqaralyq aqparat quraldaryn damytý ekeni belgili. Memleket basshysynyń halyqqa arnaǵan bıylǵy Joldaýynda bul baǵytta aıqyn tapsyrma júkteldi. Qazir sol boıynsha birqatar is-shara qolǵa alynǵan eken.
– Biz qazir BAQ týraly zańdy qaıta ázirleý jumystaryn júrgizip jatyrmyz. Jaqynda «Rýhanı jańǵyrý» Qazaqstandyq qoǵamdyq damý ınstıtýty» alańynda Bas redaktorlar klýbynyń múshelerimen kezdesýde BAQ-qa qatysty birtalaı másele kóterilip, usynystar aıtyldy. Qazirgi ýaqytta medıa salasyndaǵy zańnamany jetildirý úshin jumys toby qurylyp, jumysyn bastady, – dedi mınıstr.
A.Omarov sóz kezeginde Almaty oblysynda BAQ-ty damytýǵa basa nazar aýdarylyp otyrǵandyǵyna da keńinen toqtaldy. Búginde óńirde 218 aqparat quraly jumys isteıtindigin atap ótken mınıstr sóz kezeginde memlekettik aqparattyq tapsyrysty ýaqtyly ótkizýdi qamtamasyz etý qajettigin de qulaǵdar etti.
Aqparat jáne qoǵamdyq damý mınıstrliginiń taǵy bir baǵyty elimizdiń Jastar saıasatyn júzege asyrý bolyp otyr. Derek boıynsha, Qazaqstanda 3,7 mln jas bolsa, onyń 40 paıyzy aýyldaǵy jastar eken. Al Talǵar aýdanynda resmı statıstıka boıynsha eldi mekende 49 myń jas azamat turady. Qazir jastardy qoldaý boıynsha kóptegen mehanızm men jańa jobalar júzege asýda. Aıtalyq, «Alǵashqy jumys orny» jáne Zhas Project jobalary, «Táýelsizdik urpaqtary» granttarymen qarjylandyrý sheńberinde tıisti is-sharalar júzege aspaq. Osy jobalar boıynsha eńbekke aralasyp, kásibin ashýdyń múmkindikteri mol ekendigi de egjeı-tegjeı aıtyldy. О́tken jyly bıznesti jańa bastaǵan jas kásipkerlerge 30 grant bólinip, baıqaý jarııalanǵan. Jobaǵa Almaty oblysynan eki jas qatysypty. Biri Jambyl aýdanyndaǵy Áset Beıseýov atyndaǵy mekteptiń muǵalimi bıomehanıkalyq protez daıyndaý úshin grant ıelense, ekinshisi jıhazdy qaıta qalpyna keltiretin jobasy úshin grant utyp alǵandyǵyn atap ótti. Grantty Prezıdent ózi tapsyrǵan.
Resmı jıynnan keıin mınıstr A.Omarov aýdan turǵyndarymen ashyq dıalogqa kóshti. Mınıstrmen kezdesýge kelgen turǵyndarǵa sóz kezegi tıisimen ashy da bolsa aqıqatyn izdegen mańyzdy máselelerdiń tıegi aǵytyldy. Ol árıne, aldymen kópbalaly analardyń baspanaǵa qol jetkize almaýy, úı alý kezeginiń jyljymaýy syndy janaıqaıy bolsa, endi biri aýyl jastarynyń jumyssyz júrgendigin, kásibin ashýǵa qoldaý tappaıtyndyǵyn alǵa tartty. Sondaı-aq qoǵamdyq keńestiń múshelerin qaıta saılaý, aýyldaǵy ÚEU-nyń máseleleri, akkredıtasııa, tipti jol men aýyz sýdyń problemalary da esh kedergisiz mınıstr nazaryna usynyldy.
Kezdesýde Talǵar aýdanynyń turǵyndary, tanymal qalamgerler Musa Janádilov, Qorǵanbek Amanjolov, Beksultan Kólbaev, Tursynbek Jalǵasbaev, Kamnur Tálimuly, kásipker-ustaz Naılıa Úmbetova din men til, aýdandyq gazetke qatysty ótkir de ózekti máselerdi jaıyp salyp, naqty sheshim qabyldaýǵa yqpal etýdi surady.
