«Moı gorod» basylymynyń málimetinshe, oqys oqıǵa 25 sáýirde №36 mektep-gımnazııada oryn alǵan.
Qalalyq bilim bóliminiń basshysy Ferýza Shańgereeva bul kúni 10-shy jáne 11-synyptyń eki oqýshysy arasynda dúrdarazdyq týyndap, mektep dárethanasynda jalǵasqanyn aıtady. 10-synyptyń oqýshysy ekinshisin uryp jatqanda olardyń janynda 9 jáne 11 synyptardyń alty oqýshysy bolǵan.
«Mektep medbıkesi balaǵa medısınalyq kómek kórsetti, qazir ol dárigerlerdiń baqylaýynda. Tóbeleske qatysýshylardyń barlyǵymen jáne olardyń ata-analarymen túsindirý jumystary júrgizildi. Oqý ornynyń dırektory jaýapkershilikke tartyldy. Bolashaqta bul mekteptiń tárbıe prosesi qatań baqylaýda bolady», deıdi Ferýza Shańgereeva.
Oblystyq balalar aýrýhanasynyń dırektory Nurqabyl Aıtmuhambetov 25 sáýirde saǵat 17:30-da medısınalyq mekemeniń qabyldaý bólimine jaraqaty bar naýqas kelip túskenin habarlady. Ol otolarıngologııa bólimine jatqyzylǵan.
«Naýqasqa medısınalyq kómek kórsetildi. Alaıda oǵan shuǵyl ota qajet bolmaǵandyqtan jáne oblysta jaq-bet hırýrginiń joqtyǵynan naýqasty BQO mamandaryna jiberý týraly sheshim qabyldandy. Oǵan 7-10 kún ishinde josparly ota jasalý kerek bolatyn. Alaıda naýqastyń ata-anasy qolhat berip, óz erkimen bosatyp alyp, ony BQO-ǵa alyp ketti», deıdi Nurqabyl Aıtmuhambetov.
