«Prezıdent Qasym-Jomart Toqaev halyqqa Joldaýynda buqaralyq sport, dene shynyqtyrý jáne balalar basymdyqqa ıe ekenin atap ótti. Memleket basshysy balalar men jasóspirimderdiń sporttyq áleýetin qoldaýdyń jańa ınstıtýtyn engizýdi tapsyrdy. Osyǵan baılanysty Prezıdent Joldaýyn qoldaý maqsatynda balalar, jastar jáne múgedektiktiń barlyq túri bar eresekter qatysqan chempıonat uıymdastyryldy. Bul – múgedekter arbasyna tańylǵan, kórmeıtin, sańyraý, mylqaý, aqyl-oıy buzylǵan jáne aýtızm aýrýy bar balalar. Chempıonattyń basty maqsaty – elordada osy sport túriniń tanymaldylyǵyn arttyrý, sondaı-aq el chempıonatyna qatysatyn myqty sportshylardy anyqtaý», dedi dene shynyqtyrý jáne sport basqarmasynyń basshysy Samat Jylqybaev.
Atalǵan chempıonat Nur-Sultan qalasy ákimdiginiń jáne qalalyq dene shynyqtyrý jáne sport basqarmasynyń qoldaýymen ótti.
«Týrnırge múmkindigi shekteýli sportshylar qatysty. Bul para-karate chempıonaty memlekettik reforma aıasynda alǵash ret uıymdastyrylyp otyr. Barlyq bala Nur-Sultan qalasynda ARTSPORTEDU memlekettik baǵdarlamasy aıasynda №10, 37 jáne 91 mektepterdiń seksııalary men úıirmelerde qarjylandyrý boıynsha jattyǵady. Sondaı-aq múmkindigi shekteýli sportshylarǵa arnalǵan jasóspirimder sport mektebinde de bilim alyp jatyr. Buryn mundaı jarystar tek densaýlyǵy jaqsy balalar arasynda ótkiziletin. Qazir múgedek balalar arasynda da jıi ótedi. Jarysqa 60-qa jýyq sportshy qatysty», dedi Para-karate federasııasynyń prezıdenti Meıramgúl Dýkýeva.
Jarysty Qazaqstan Respýblıkasynyń Para-karate federasııasy, Nur-Sultan qalasynyń WKF karate-do jáne dástúrli jaýyngerlik óner federasııasy jáne №91 mektep-gımnazııasy uıymdastyrdy. Jeńimpazdar medaldarmen, gramotalarmen jáne syılyqtarmen marapattaldy.
