– Kúrestiń úsh túri boıynsha Qazaqstannyń balýandary 5 altyn, 8 kúmis jáne 8 qola medal oljalady. Barlyǵy – 21 júlde. Osy kórsetkishke kóńilińiz tolǵan shyǵar?
– Byltyrǵy jeltoqsan aıynda Respýblıkalyq kúres federasııasynda biraz ózgeristerdiń bolǵanyn ózderińiz jaqsy bilesizder. Basshylyq quramynan bastap, ulttyq, jastar jáne jasóspirimder komandalarynyń bapkerleri aýysty. Qysqa ǵana merzimde olar aýqymdy ister atqaryp, sonyń nátıjesinde Azııa chempıonatynda jaqsy nátıje kórsettik. Atalǵan jarysqa Qytaı quramasy ǵana kelmedi. Qalǵan myqty komandalardyń barlyǵy da Ulanbatyrda óner kórsetti. Bozkilemge shyqqandar arasynda ár jyldary Olımpııa oıyndary men álem chempıonattarynda atoı salǵan sańlaqtar da boldy. Eń bastysy, jaýapty jarysta jerlesterimiz óz jankúıerlerin jerge qaratqan joq. Grek-rım kúresi sheberleri jalpy esepte kósh bastady. Negizi sol mejeden kórine almaǵanymyzǵa biraz ýaqyt bolǵan edi. Bul joly josparymyz oıdaǵydaı júzege asty. Al erkin kúres pen áıelder kúresi saıysynda otandastarymyz úshinshi oryndy ıelendi. Árıne bul – óte jaqsy kórsetkish! Biraq oǵan toqmeıilsýge bolmaıdy. Qazaqstanda kúres óneriniń deńgeıin kóterý úshin áli talaı sharýa atqarýymyz kerek.
– Iá, grek-rım kúresi sheberleriniń tabysy qomaqty bolǵany sózsiz. Bir keremeti, bozkilemge shyqqan 10 balýannyń toǵyzy jeńis tuǵyryna kóterildi. Oljaǵa kenelgen sol órenderimizdiń barlyǵy óz deńgeıinde óner kórsetti dep oılaısyz ba?
– Kúrestiń ár túri boıynsha álem jáne qurlyq chempıonattarynda 10 júlde jıyntyǵy sarapqa salynǵanymen, Olımpııa oıyndarynda beldesýler alty salmaq dárejesi boıynsha ǵana ótetini ózderińizge málim. Bir aıta keterligi, bas júldeni oljalaǵan Meıirjan Shermahanbet (67 kılo) pen Álimhan Syzdyqov (130 kılo) dál sol olımpıadalyq salmaqtarda óner kórsetti. Soǵan qýanyp otyrmyz. Mońǵolııada olar óte jaqsy kúresti. Sheshýshi tusta bizdiń órender azýly qarsylastarymen aıqasqandaryna qaramastan, ózderiniń qaısarlyǵy men tabandylyǵynyń arqasynda altyn tuǵyrǵa kóterildi. Osyndaı jeńister sportshylardyń óz-ózine degen senimin nyǵaıtady. Sonymen qatar jaýapkershilikteri de artady. Aldaǵy ýaqytta Meıirjan men Álimhan budan da zor tabysqa qol jetkizý úshin barynsha kúsh salady degen oıdamyn.
Iá, «áttegen-aı!» degen tustarymyz da joq emes. Máselen, talaı dúbirli dodada daralanǵan Meırambek Aınaǵulovtyń (63 kılo) ónerine kóńilim tolmady. Fınalǵa deıin óte jaqsy kúresken ol sheshýshi tusta shabysynan jańyldy. Amanǵalı Bekbolatov ta (55 kılo) dál sondaı jaǵdaıdy basynan keshirdi. Ekeýi de kúmis júldeni qanaǵat tutty. Jastar býyny ókilderi arasynan Ernur Fıdahmetovten (60 kılo) budan da zor nátıje kútken edik. Biraq ol qola medalmen shekteldi. Endi sol olqylyqtardy túzeý úshin bizder bar, bapkerler men balýandar bar, barlyǵymyz birigip, kóp jumys isteýimiz kerek.
– Qazaqstan quramasyn bıyl eki birdeı asa jaýapty jarys kútip tur. Birinshisi – Azııa oıyndary, ekinshisi – álem chempıonaty. Elimizdiń eń úzdik balýandary sol básekelerdiń qaısysyna qatysady?
– Biz úshin Azııa oıyndary mańyzdyraq. Sol sebepti de elimizdiń birinshi nómirli balýandary tórt jylda bir ret alaýy tutanatyn sary qurlyqtyń basty dodasynda óner kórsetedi. Bul jarys – 10-25 qyrkúıek aralyǵynda Qytaıdyń Hanchjoý qalasynda ótedi. Sol jerde myqtylyǵymyzdy túbegeıli moıyndatýǵa tıispiz. Al qosalqy quramdaǵy balýandar Serbııanyń astanasy – Belgradta jalaýy jelbireıtin álem chempıonatynda kúsh synasady.
– Áńgimeńizge rahmet.
Áńgimelesken
Ǵalym SÚLEIMEN,
«Egemen Qazaqstan»
