«2022 jyly 26 sáýirde áleýmettik jelilerdegi aqparatqa monıtorıng júrgizý barysynda Kaspıı teńiziniń jaǵalaýynda «Qarajanbas» ken ornynyń sý bógeti mańynda óli ıtbalyqtardyń 50-ge jýyq ushasy tabylǵany týraly aqparat anyqtaldy.
Oqıǵa ornyna Jaıyq-Kaspıı oblysaralyq basseındik balyq sharýashylyǵy ınspeksııasynyń Mańǵystaý oblysy boıynsha balyq ınspeksııasy basqarmasynyń memlekettik ınspektorlary jedel joldandy», delingen habarlamada.
Jaýapty memlekettik organdar arasynda 2021-2022 jyldarǵa arnalǵan ózara is-qımyl josparyna sáıkes, sý janýarlarynyń jappaı qyrylý jáne qaýip-qaterin anyqtaý úshin jumys toby qurylýda. Osy maqsatta oblystyq quqyq qorǵaý, tabıǵat qorǵaý organdaryna, prokýratýra, veterınarııa, jergilikti atqarýshy organǵa, ekologııa jáne tótenshe jaǵdaılar departamentine jedel habarlandy.
«2022 jyly 26 sáýir saǵat 23:00-ge deıin kelip túsken aqparatqa sáıkes, teńiz jaǵalaýynyń árbir jerinde jatqan 22 óli ıtbalyq tabyldy. Itbalyqtardyń ólý sebepterin anyqtaý úshin janýarlardyń ushalaryn zerthanalyq tekserýge alý múmkindigin ınspeksııa qyzmetkerlerimen qarastyrylýda, óıtkeni olardyń deneleri ydyraý kúıinde. Qazirgi ýaqytta Mańǵystaý oblystyq Balyq ınspeksııasy basqarmasynyń ınspektorlary balyq sharýashylyǵy sýbektileriniń qoryqshylyq qyzmetimen birlesip, Kaspıı teńiziniń jaǵalaý aımaǵy men basqa da ýchaskelerge baqylaý jasaýda. Zerthanalyq zertteýler júrgizý úshin balyq qorǵaý ınspektorlary birneshe ıtbalyqty, teńiz sýy men topyraqtan synama aldy. Olar Ekologııa departamenti men veterınarlyq qyzmetine tapsyrylatyn bolady», dep habarlandy vedomstvodan.
2022 jylǵy 27 sáýirde atalǵan organdar qyzmetkerleri oqıǵa ornyna shyǵýdy josparlaýda. Sonymen qatar, atalǵan fakti týraly QR BǴM Ǵylym komıtetiniń «Mıkrobıologııa jáne vırýsologııa ınstıtýty» zerthanasynyń qyzmetkerlerine, sondaı-aq «Gıdrobıologııa jáne ekologııa ınstıtýty» Batys Qazaqstan mekemesiniń qyzmetkerlerine habarlandy. Jaǵalaýdy baqylaý jumystary jalǵasýda. Jańartylǵan aqparat qosymsha jarııalanady.
