О́zgerister saıası ınstıtýttarǵa aıtarlyqtaı áser etedi. Negizgi Zańǵa depýtattardy, onyń ishinde bir mandatty okrýgterden saılaýdy kózdeıtin jańa saılaý júıesi engiziletin bolady. Bul ózgeris jas kadrlardyń básekege qabilettiligin arttyrýǵa múmkindik beredi. Memleket basshysy Jańa Qazaqstan birinshi kezekte Ádiletti Qazaqstan ekenin atap ótti. Sondyqtan Konstıtýsııaǵa engiziletin túzetýlerde kózdelgen adam quqyqtaryn qorǵaý máselesi qoǵamnyń ózgerýine, jańa satyǵa kóterilýine sep bolary daýsyz.
Konstıtýsııalyq ózgerister Konstıtýsııalyq sot sııaqty jańa qurylymdar qurýdy qarastyrady. Bul jańashyldyq azamattardyń quqyqtaryn qorǵaý qaǵıdattaryn edáýir dárejede kúsheıtedi. Qatardaǵy azamattar men Adam quqyqtary jónindegi ýákildiń oǵan júginý múmkindigi, bul qazaqstandyqtardyń múddeleriniń, quqyqtary men bostandyqtarynyń saqtalýyn baqylaýdy qamtamasyz etedi.
Sonymen qatar Qazaqstannyń ólim jazasynan tolyǵymen bas tartqanyn, endi bul jaza normatıvtik-quqyqtyq deńgeıde aıqyndalmaǵanyn atap ótken lázim. Bul norma óte qarapaıym bolyp kórinedi. О́ıtkeni mundaı jaza shekteýli ekeni ras. Biraq onyń tolyq joıylýy bizdiń qoǵamdy adam quqyqtaryn saqtaý isinde jańa bıikke bastaıdy.
Árqaısymyz ózgeristerge tikeleı jaýapty ekenimizdi túsinýimiz kerek. Biz bárimiz osy elde jáne osy qoǵamda ómir súremiz, sondyqtan Jańa Qazaqstan ıdeıasy barshamyzǵa ortaq. Bizdiń bolashaqty qalaı quratynymyz, ádiletti qoǵamdy qalaı qalyptastyratynymyz tikeleı ózimizge baılanysty.
Tımýr JUMYRBAEV,
Qazaqstan halqy Assambleıasy
Keńesiniń múshesi,
«Assambleıa jastary» qoǵamdyq birlestiginiń tóraǵasy
