Dáneker

Azamattyq  qoǵam – úlken kúshke  aınalyp  keledi. Úkimettik  emes uıymdar atqarýshy  bıliktiń barmaǵan, múmkin  úlgermegen máselelerin kóteredi, istiń sheshimin  tabýyna jaǵdaı jasaıdy.  Sóıtip, atqarýshy  bılik pen jurtshylyq  arasyndaǵy  dánekerge  aınalady. Jaqynda Prezıdent Ákimshiligi, Máde­nıet mınıstrligi jáne Qostanaı oblystyq ákimdigi birigip ótkizgen semınarda osy másele qaraldy. Oǵan Astana jáne Almaty qalalarynyń jáne oblystardyń ishki saıasat basqarmalarynyń jetekshileri qatysty. Semınar ótkizilip otyrǵan Qos­tanaı oblysy óńirindegi atqarylǵan ister semınarǵa qatysýshylardyń qyzyǵý­sh­ylyǵyn tý­ǵyzdy. Úkimettik emes uıym­dardyń basy-qasynda júrgen entýzıastar bul kúnde qaıyrymdylyq jobalardy tek utyp alǵan grant qarjysyna ǵana atqarmaıdy, oǵan kásipkerlikten túsken tabysty da salady. Oblystyń áleýmettik damýynda mańyzdy sektorǵa aınalyp otyrǵan úkimettik emes uıymdar problemalyq máselelerdi sheshýge kelgende memlekettik organdardyń tolyqqandy áriptesine aınalyp úlgerdi. Semınarǵa qatysýshylarǵa Qostanaı oblysynda jumys istep jatqan birneshe úkimettik emes uıymdar jumysy tanystyryldy. Mysaly, «Arylý» («Preodolenıe») or­talyǵy músheleriniń basym kópshiligi arba­da otyrǵan jandar. Onyń zaldary zama­­naýı elektrondy apparatýralarmen, trena­jerlarmen jabdyqtalǵan. Múmkindigi shek­teýli jandar osyǵan kelip jattyǵady. Olar­ǵa muny eshkim de jasap bergen joq, ózderi qol jetkizdi. Ortalyq músheleri «jyla­maǵan balaǵa emshek joq» degen qazaqy qaǵıdanyń durystyǵyn áldeqashan túsingen. Sondyqtan, olar ákimdikten dúken­derge deıin, jalpy, arbada otyrǵan adam­dardyń baratyn oryndarynyń barly­ǵyn da elimizdiń zańdaryna sáıkes qolaıly pandýstardyń bolý kerektigin zertteıdi, tek­se­redi, tıisti oryndarǵa aıtyp, jasatady. Al «Hatıko» qalpyna keltirý ortaly­ǵyna baryp, múgedekter demalady, emdeledi. Ol ormannyń ishinde, tabıǵat aıasynda ornalasqan. Mańdaıshasyna «Japon halqynan eskertkish» dep jazylǵan. Máttáqam japondar grantpen bergen qarjysynyń óz maqsatyna jumsalýyn jáne tez oryndalýyn jiti qadaǵalapty. Úkimettik emes uıym músheleri ormannyń ishine lezdiń arasynda erekshe úıdi salyp, onda múmkindigi shekteýli jandardyń emdelýi men demalýyna jaǵdaıdy jasap qoıdy. Tórt qabyrǵany baqqan ǵarip jandardyń kópshiligine ormandaǵy mundaı demalys úıine barý túgili úıden shyǵýdyń ózi muń emes pe? Úkimettik emes uıymdardyń belsendi qyz­metin jergilikti bılik te eskermeı otyr­ǵan joq. Osydan bir-eki jyl bur­yn olardyń paıdalanýyna Qostanaı qalasyndaǵy sándi tarıhı ǵımarattyń birin berdi. Onda qazir «GrIn» azamattyq bastamalardy damytý ortalyǵy ornalasqan. Bul qamqorlyqtyń qarym­tasyn úkimettik emes uıymdar qaıtar­maı otyrǵan joq. «GrIn» ortalyǵy osy az ýaqyt ishinde úkimettik emes uıymdar mú­she­lerine úsh myńdaı aqyl-keńester ber­di, otyzdyń syrtynda semınarlar men trenıngter, eki ret áleýmettik bastamalar men jobalar jármeńkesin ótkizdi. Sonymen qatar, memlekettik suranystardy oryndap, ondaǵan mıllıon teńgeniń granttaryn júzege asyrdy. Semınarǵa qatysýshylar úkimettik emes uıymdar men jergilikti bılik yqpaldasa jumys istese sheshimin tappaıtyn másele bolmaıtynyn túsindi. Názıra JÁRIMBETOVA, «Egemen Qazaqstan». QOSTANAI.