Nebary 13 jasar avtor búgingi tańda ádebıettiń aıryqsha suranysqa ıe jáne barynsha paıdaly túrin qalyptastyrý baǵytynda sheberlik saǵattaryn ótkizdi. Danıel Ahmed Nur-Sultan jáne Almaty qalalarynda bolyp, sapar sońynda Býrabaıǵa soqqan. Ondaǵy maqsaty osy óńirdegi jastarǵa komıksterdi qalaı salýǵa bolatynyn úıretý. Kommersııalyq emes qoǵamdyq uıymnyń qoldaýymen uıymdastyrylǵan shyǵarmashylyq sát óte tartymdy ótti. Sóz arasynda álemge aty shyqqan jas avtormen kezdesý týraly ıdeıa Gıldııa delegasııasynyń bıyl naýryz aıynda oblys ákimi Ermek Marjyqpaevpen kezdesýi kezinde týyndaǵan. Bul indet qursaýynan shyǵyp kele jatqanda jastardyń janyn jadyratatyn jaǵymdy jańalyq boldy.
Tabıǵaty tamyljyǵan Býrabaı baýraıynda Gıldııa ujymynyń beldi ókili Iýsýf Krykbesovtyń qoldaýymen ótkizilgen sharaǵa 11 men 25 jas aralyǵyndaǵy 200-den astam jas qatysyp, komıksterdi jasaý negizderimen tanysty.
– Bizdiń jolymyz boldy. Býrabaı baýraıyna Danıel Ahmed keldi, – deıdi Iýsýf Jaǵyparuly, – balalardyń aǵylshyn tilinde sóılesip, pikir almasýynyń ózi kóp jaıdy ańǵartatyn edi. Shyǵarmashylyq qyzmettiń eýropalyq modelderi óte mańyzdy.
Alǵashqy sheberlik synyby joǵary tehnologııalyq kolledjde bastaldy. Bul jerde bolashaq baǵdarlamashylar men dızaınerler komıkster jasaý tásilimen tanysty. Mektep oqýshylary tarapynan úlken qyzyǵýshylyq týyndady. Bilim oshaǵynyń dırektory Qýanyshbek Shaıahmetov Gıldııa komandasyna alǵys aıta otyryp, basqa da jobalarǵa qatysqysy keletindikterin jetkizdi. Dál osyndaı kezdesý «Arman» óner mektebinde de sabaqtasty. Jas tyńdaýshylar keıipkerlerdiń bet-álpetin sýretteýdiń tehnıkalyq egjeı-tegjeıine úńildi. Bir aıta keterlik jaıt, Danıel sheberlik synyptaryn óte qyzǵylyqty ótkizedi. №1 gımnazııa oqýshylary Ulybrıtanııadaǵy bilim berý mekemeleriniń tájirıbesin surap, qyzyǵýshylyq tanytty. Qaı jerde bolsyn shyǵarmashylyq atmosfera kilkip turǵan bolatyn. Balalardyń ishindegi batyldary Danıelden qoltańba da surap jatty.
Joǵary pedagogıkalyq kolledjde Danıel stýdent aýdarmashylarmen til tabysyp, emin-erkin áńgimelesti. «Hertfordshire Press» baspasynyń negizin qalaýshy jáne jetekshisi, ECG (London) vıse-tóraǵasy Marat Ahmedjanov daryndy jastar qatysa alatyn jobalardy, sondaı-aq, komıkstiń ózin jeke tanystyryp ótti.
– Kóbinese muǵalimder men ata-analar kúlkili kitapty zııandy dep sanaıdy, – dedi Marat Ahmedjanov, – statıstıkaǵa júginip kórińizshi, 2020 jyly AQSh komıksteriniń búkil ındýstrııasy shamamen 800 mlrd teńge tabys tapty. Endi oılańyz, 1 mlrd dollardan artyq aqsha tabý jaman ba?
2021 jyly satylymdar kólemi 70 paıyzǵa ósken. Satylǵan komıkster sany da kóp. Qazir bul sala jańa altyn ǵasyrdy basynan ótkerip jatyr.
Álemniń ár qıyryndaǵy úzdik jańalyq Alash balasy úshin de jat bolmaýǵa tıisti. Jaqsy iske umtylý, uqsap baǵý nege jaman bolsyn. Úzdikke elikteý túptiń túbinde jas qııalǵa qanat bitirip, ushpaqqa shyǵarmaı ma?!
Aqmola oblysy,
Býrabaı aýdany
