Bul – el tarıhynda Abaı Qunanbaev pen Muhtar Áýezovke arnalǵan tuńǵysh monoopera. О́ner keshi 2 bólimge bólingen. «Abaıǵa taǵzym» atty alǵashqy bólimde uly aǵartýshynyń «Jasymda ǵylym bar dep eskermedim», «Segiz aıaq», «Qarashada ómir tur» sııaqty birneshe áni shyrqalsa, «Abaımen syrlasý» bóliminde Abaı óleńderine arnalǵan vokaldyq toptama jáne ózge de óleńderi oryndaldy. Jalpy, óner keshinde Abaıdyń 15 shyǵarmasy usynyldy.
Pavlodar qalasyndaǵy oblystyq Isa Baızaqov atyndaǵy fılarmonııanyń konserttik zalynda ótken keshke jınalǵandar tereń oıǵa berilip, ár týyndyny únsiz tyńdady. Kesh sońynda ǵana oryndarynan tik turyp, dý qol shapalaqpen alǵystaryn jaýdyrdy. Shahımardan Ábilov: «Kórermenderden kútkenim de sol. Aýdıtorııa Abaı lırıkasynyń kómegimen oılanyp, tazarýy kerek», dep keshtiń maqsatyn aıqyndap berdi.
– Búginde Abaıdy oqıtyndar az. Onyń fılosofııasyna senbeıtinder de bar. Abaı – planetarlyq aýqymdaǵy tulǵa. Biz oılanýǵa jınaldyq. Abaıdyń ózi aıtqandaı, negizgi maqsatymyz – jastardy aǵartýshylyqqa úndep, olarǵa kómektesý, – dedi Sh.Ábilov.
Daryndy vokalshy óziniń «mýzykalyq oılarymen» eń áýeli jerlesterin sýsyndatýdy kózdegen. Osy rette óner keshi oblys ortalyǵynda ǵana emes, Ekibastuz qalasynda, Baıanaýyl jáne Sharbaqty aýdandarynda da uıymdastyryldy. Al 18 mamyrda Almaty qalasyndaǵy Abaı atyndaǵy opera jáne balet teatrynyń sahnasynda qoıylady dep kútilýde.
