Qazir munaıly óńirde túrli sebeppen osyndaı sanatqa engen jandardyń sportqa qyzyǵýshylyǵy artyp keledi. Sonyń ishinde paradzıýdoshylardyń jetistigi qýantady. Máselen, byltyr Tokıoda ótken paralımpıadaǵa atyraýlyq alty paradzıýdoshy qatysyp, úsheýi kúmis júldeger atanǵan edi. Sol jahandyq dodada júlde almasa da, el namysyn qorǵaǵan jankeshti sportshylardyń qatarynda Amanjol Janbota men Ǵalymjan Smaǵululy da bar.
Jaqynda atalǵan paradzıýdoshylar Túrkııada ótken Gran Prı saıysyna qatysyp, J2 sanatynda baq synady. Álemniń 19 elinen paradzıýdoshylar qatysqan saıysta ekeýi de 90 kılo salmaqta qarsylastaryn qapy qaldyryp, aqtyq synǵa alqynbaı jetti. Sporttyq baby kelisken qos atyraýlyqtyń joly aqtyq synda túıisti. Bir-biriniń sporttaǵy ádisin jaqsy biletin olar altyn medal úshin baryn saldy.
Degenmen bul saıysta Amanjol Janbotanyń baǵy jandy. Sóıtip, Gran Prı saıysynyń jeńimpazy atanǵan ol alǵashqy altyn medaline qol sozdy. Al Ǵalymjan Smaǵululy kúmis júldeni ıelendi.
– Bul – paradzıýdoshy Amanjol Janbotanyń alǵashqy altyny. Muny paradzıýdoshylardyń jetistigi deýge de bolady. Alda áli talaı asý bar, – dep málim etti oblystyq sport jáne dene shynyqtyrý basqarmasynyń baspasóz qyzmeti.
