«Qos azamattyqqa jol berilmeıtindikten, mende reseılik tólqujat joq. Meniń Reseı tennıs federasııasymen de eshqandaı baılanysym joq. Men – qazaqpyn! Alty jyldaı ýaqyt boıy men óz elimniń namysyn qorǵap kelemin. Men Devıs kýbogynda, Azııa jáne Olımpııa oıyndarynda Qazaqstan atynan shyǵatynymdy maqtan etemin», dedi Aleksandr Býblık.
Býblık jýrnalısterdiń qıturqy suraǵyna osylaısha naqty jaýap qaıtardy. Mundaı suraqtyń qoıylýy da zańdy. О́ıtkeni tennısshi 1997 jyly Reseıdiń Gatchına qalasynda dúnıege kelgen. Al 2016 jyldan bastap Qazaqstan quramasy sapynda óner kórsetip keledi. Úlken sportta aıtarlyqtaı nátıjege qol jetkizbegen, sportshy retinde áli tanyla qoımaǵan 19 jastaǵy jigitke Qazaqstan tarapynan úlken senim kórsetildi. Onyń myqty tennısshi bolyp qalyptasýyna bizdiń elde barlyq jaǵdaı jasaldy. Nátıjesi de kóp kúttirgen joq. 2016 jyly álemdik reıtıngte 200-orynda turǵan Býblık alty jyldyń ishinde úzdik 40 tennısshiniń qataryna qosyldy. Tipti álemniń myqty sportshylary Býblıkpen sanasatyn boldy. «Úlken dýlyǵa» týrnırleriniń jekelegen básekesinde ol jyl saıyn úshinshi kezeńge deıin jetip júrgen bolsa, bıyl juptyq básekede alǵash ret Fransııa ashyq birinshiliginiń fınalynda óner kórsetti.
Sondaı-aq ol Qazaqstan quramasy sapynda da kóptegen nátıjege qol jetkizdi. Máselen, Býblık bastaǵan jigitter jyl saıyn Devıs kýbogynyń fınaldyq kezeńinde baq synaıdy. 2018 jyly jazǵy Azııa oıyndarynda Denıs Evseevpen birge juptyq synda kúmis medal jeńip alsa, byltyr alǵash ret el namysyn Tokıo Olımpıadasynda qorǵady.
Alty jyl boıy Qazaqstannyń namysyn qorǵap, úlken jetistikke jetip kele jatqan Aleksandr Býblık aldaǵy ýaqytta da eldiń mereıin asqaqtata beretini anyq. «Qazaq» ekenin álemge áıgilegen tennısshi týǵan elin jetistigimen qýanta bersin dep tileımiz.
