Mahambet aýdanynda Sarytoǵaı atalatyn aýyl bar. Munda qazaqpen birge ózge etnostyń ókilderi de turady. Solardyń biri – Bobrovtar otbasy.
– Ákem Semıon Sarytoǵaıdan qonys aýdarǵan joq. Sheshem Rozanyń ata-anasy Tájikstannan kóship kelgen. Sarytoǵaıdaǵy orta mektepti bitirgen soń H.Dosmuhamedov atyndaǵy Atyraý ýnıversıtetine aǵylshyn tiliniń muǵalimi mamandyǵyna oqýǵa tústim. Mektepte oryssha oqysam da qazaq tilin jetik biletin edim. Buǵan mekteptegi ustazym Izǵalı Qashaýbaevtyń qoldaýymen qazaq tili páninen olımpıadalarǵa qatysyp, júldeli oryndardy ıelengenim sebep bolǵanyn jasyrmaımyn. Mektepte mýzykadan dáris bergen jergilikti kompozıtor Qaıyrjan Ihsanov qazaqtyń halyq ánderin oryndaýyma septigin tıgizdi. Qazaqsha ánderdi áli de aıtyp júrmin, – deıdi Lıýdmıla Bobrova.
Onyń aıtýynsha, úlken aǵasy qazaq qyzyna úılengende ata-anasy quda túsý, syrǵa salý joralǵysyn jasaǵan. Bul keıingi aǵalary úılengende de jalǵasyn tapqan. О́zi on bes jasqa tolǵanda taǵy bir aǵasy Jansulý esimdi qazaq qyzyna úılenipti. Sol kezde jeńgesiniń jasy 18-de eken. Jeńgeleri qazaq halqynyń salt-dástúri men jón-joralǵysyn úırenýine yqpal etken. Ásirese, Jansulý jeńgesi Kórisý kúni – 14 naýryz ben Ulystyń uly kúni – 22 naýryzda ulttyq taǵamdardy pisirip, erekshe dastarqan daıyndaıdy eken.
Lıýdmıla Bobrova 18 jyl buryn qazaq jigiti Ǵalymjan Jıenqulovqa turmysqa shyqqan. Qazir Taldykól aýylynda turatyn Ǵalymjan men Lıýdmılanyń bir qyzy, tórt uly bar. Balalarynyń úlkeni kolledjde oqıdy. Kúıeýi «QazSýshar» RMK-nyń Atyraý fılıalynda jumys isteıdi. Al Lıýdmıla – mektep muǵalimi.
– Bala kúnimnen qazaq balalarymen birge oınadym. Biraq otbasylyq ómirimdi qazaq jigitimen baılanystyramyn dep oılamappyn. Ǵalymjanmen shańyraq kóterýge sóz baılasqanda, buǵan áke-sheshem de, aǵalarym da qarsy bolmady. Sóıtip, qazaq otbasynyń tabaldyryǵyn attadym. Ata-enem meni óz qyzyndaı baýyryna tartty. Olar – óte meıirimdi, adal, sabyrly, aýyldastarymyz syılaıtyn qarapaıym jandar. Meniń jaqsylyǵymdy asyryp, bilmegenimdi úıretip, qoldaý kórsetkenin jadymnan shyǵarmaı kelemin, – dep aǵynan jaryla áńgimeleýden jalyqpaıdy ol.
Úlken enesiniń kóp jyl qulaǵyna taqqan syrǵasyn berip, únemi jaqsylyq tilegenin eshqashan umytpaıdy. Kishi enesinen de kóp nárseni úırengen. Eneleri udaıy batasyn berip otyrady eken. Ata-enesi – jeti bala tárbıelegen kópbalaly otbasy. Qazir qazaq jigitinen baqytyn tapqan ol tatýlyǵy jarasqan úlken áýlettiń shyraǵyn mazdatyp otyr.
– Jańa túsken kelinge qurmet kórsetip, kelin shaıǵa shaqyratyn joralǵy qazaqtan basqa ultta joq. Qazaq halqynyń ár salt-dástúri men joralǵysynyń astarynda úlken tárbıelik mán bar. Enemniń ómirden ótkeni ókinishti-aq. Qazir atamyzben bir úıde turamyz. Úıimizden áli kúnge qonaq úzilgen emes. Ulystyń uly kúninde aǵaıyn-týysqa Kórisý shaıyn berdim, – deıdi Lıýdmıla Bobrova.
