Ǵylymı aqparat taratatyn saıt

Facebook áleýmettik je­li­sin­de «Ǵylym – kúsh» deıtin ǵy­lymı t­op bar. Oǵan 9 myń 300-den asa adam jazylǵan. Atalǵan topta ǵylymı jańalyqtar men zertteýlerdiń qysqasha mazmuny jazba retinde berilip otyrady. Joba jetekshisi, hımııa ǵylymdarynyń PhD doktory Jeksen Toqtarbaı áleýmettik jelidegi tanymdyq materıaldardy qoǵamǵa keńinen taratý maqsatynda saıt ashqanyn aıtty.

– Saıt tabys tabý úshin emes, bar bolǵany ǵylymı ja­ńa­lyqtardy, ǵylymdy, ǵa­lym­dar­dyń eńbegin keńinen nası­hattaý maqsatynda ashyldy. Kommersııalyq maqsatta bolma­ǵan­dyqtan, arzan ataq úshin ardan bezip kórilim jınamaımyz. Ázirge muny ózim negizgi jumysymnan bólek júr­gi­zip júrmin. Sondyqtan kún saıyn saıt jańaryp turady dep aıta almaımyn. Degenmen ǵalymdardan qyzyqty materıaldar kóptep keledi, sony iriktep, paıdalysyn halyqqa usynamyn. Bul – men úshin jaı ǵana azamattyq is. Áıtpese buǵan eshqandaı jalaqy almaımyn. Negizi osyǵan deıin ǵylymı jańalyqtardy «Ǵylym – kúsh» tobynda jarııalap kelgen edim. Biraq áleýmettik jelidegi materıaldar gýglden izdegende ońaı tabylmaıdy eken. Jáne kerek kezde jeliden burynǵy jazbalardy tabý qıyn. Sol sebepti bárin bir jerge jınaqtap, izdegen adamǵa ońaı tabylatyn qor retinde saıt ashýdy jón kórdik, – deıdi J.Toqtarbaı.

Joba jetekshisiniń aıtýynsha, gylym.kz saıtynda tek qana qazaq tilinde ǵylymı jańa­lyq­tar jarııalanady. Saıa­sat­qa, saıası ózgeristerge, reıtıng qýǵan jeńil ónimderge, shoý­ǵa, jarnamalarǵa jol be­ril­meıdi. Degenmen barlyq saıt qoldaný­shy­dan, ǵylym­ǵa yntasy bar azamattardan, ǵy­ly­mı qaýym­das­tyqtan paıdaly, ǵylymı aqpa­rattar qabyl­daý­ǵa ashyq.

– Saıttyń jumysyna ǵy­lym­­­ǵa jaýapty memlekettik uıym­­­dardan ázirge qoldaý-kó­­mek berilgen joq. Jalǵyz ózim qosymsha jumys retinde atqa­ryp otyrǵandyqtan, kóp materıalǵa úlgermeýim múmkin. Sol sebepti qazaqsha ǵylymı ja­ńalyqtar bolsa, jeksen.toq­tar­bay@gmail.com elektrondy poshtasyna joldap, saıtty paıdaly aqparatpen qamtýǵa qoldaý bildirýdi suraımyn. Halyqqa eń áýeli bilim kerek. Bilim alý úshin aldymen ǵy­lym-bilimge degen durys túsinik pen ǵylymnyń mańyzyn tú­sindiretin qural qajet bolyp tur. Sol joqtyń ornyn tol­tyrýǵa nıettenip otyrmyz, – dedi gylym.kz saıtynyń jetek­shisi.