Prezıdentimizdiń Ata Zańǵa ózgerister men tolyqtyrýlar engizý týraly respýblıkalyq referendým ótkizý usynysy – túptep kelgende halyqtyń talap-tilegi men suranysy. Ata Zańǵa engiziletin ózgerister Jańa Qazaqstan qalyptastyrýdyń negizgi qadamy. Referendým arqyly Konstıtýsııanyń 33 babyna túzetý engiziledi. Memleket basshysy halyq únin barlyq reformalardy júzege asyrýda negizgi ári basty faktor retinde negizge alatynyn taǵy da dáleldedi. Shyn máninde, saıası jáne konstıtýsııalyq reformalardy iske asyrý jolynda respýblıkalyq referendým – naqty nátıje. Sebebi, respýblıkalyq referendým ótkizý azamattarymyzdyń konstıtýsııalyq quqyǵy, ol elimizdiń bolashaǵy úshin zor jaýapkershilik júkteıdi. Munyń túpki máni – Jańa Qazaqstan qalyptastyrý.
Assambleıa sessııasynda Memleket basshysy geosaıası ahýal týraly aıtqanda «Biz jas urpaqty naǵyz otanshyl azamat etip tárbıeleýimiz kerek. Osy rette saıası jáne qoǵamdyq plıýralızmniń radıkaldy sıpat alýyna jol berilmeıdi. Ásirese, azamattardy kemsitýge, olardyń ary men namysyn taptaýǵa bolmaıdy», dep toqtaldy. Bul rette Prezıdentimiz «Birligimiz – áralýandyqta», dep qadap aıtty.
Qoǵamda dıalog mádenıetin qalyptastyrý jáne ózara túsinistik pen senimdi nyǵaıtý qajet ekenine arnaıy toqtaldy. Prezıdent «Biz kózqarastarymyz ben nanym-senimderimizdegi aıyrmashylyqtarǵa qaramastan, bir-birimizdi túsinýge jáne qurmetteýge tıispiz. Bizdi biriktiretin, kúsheıtetin, úılestiretin ortaq qundylyqtarǵa umtylýymyz qajet. Bizdiń «Ártúrli kózqaras – birtutas ult» degen qaǵıdamyz myzǵymaıdy», dep naqtylady.
Prezıdent aıqyndap bergen reformalardy júzege asyrý jolynda Parlament Májilisiniń depýtattary belsendilik tanytyp, qoǵamdyq jáne saıası reformalardy zańnamalyq, quqyqtyq qamtamasyz etýde zańdardy qabyldaýǵa atsalysatyn bolamyz.
Juldyz SÚLEIMENOVA,
Májilis depýtaty
