UQK Shekara qyzmetiniń Almaty oblysy boıynsha departamentine qarasty Qarasaı aýdany, Aqjar shaǵyn aýdanynda ornalasqan kásibı-tehnıkalyq jáne daıyndyq bóliminde ótken rásimge sarbazdardyń týystary qatysty. Bir ereksheligi, jas jaýyngerler kýrsynan ótip jatqan 400-den astam sarbaz Ant bergen sharany búkil respýblıka jurtshylyǵy tikeleı kórsetilim arqyly tamashalady.
– Men ózimniń qarýlastarymdy bergen sertimizge adal bolyp, tabandylyqpen, erjúrektikpen boryshymyzdy óteýge shaqyramyn. Ant qabyldaý – barshamyz úshin mańyzdy kún. Elim deıtin er bolyp, qaıtpas-qaısar azamat atanyp, tepse temir úzetin áskerı ómirdiń qıyndyǵy men aýyrtpalyǵyna shydaıtyn, kez kelgen ýaqytta qolyna qarý alyp, elin qorǵaýǵa daıyn, týǵan jeriniń shekarasynda júretin sarbazdarǵa aınalamyz, – deıdi saltanatty sharada sarbazdar atynan tilek bildirgen qatardaǵy jaýynger Nursultan Abylaı.
Ár sarbazdyń ómirinde altyn árippen jazylyp qalýǵa tıis aıtýly sátte Shekara basqarmasynyń Jaýyngerlik Týy ortaǵa ákelinip, elimizdiń Ánurany shyrqaldy. Atalǵan basqarmanyń basshysy podpolkovnık N.Berdibaev sapqa turǵan sarbazdardy ataýly merekesimen quttyqtady.
Rásimge budan bólek, Almaty oblysy boıynsha departament bastyǵynyń orynbasary polkovnık A.Munalbaev, «Zastava tarlandary» respýblıkalyq qoǵamdyq birlestigi Almaty oblystyq fılıalynyń tóraǵasy zapastaǵy polkovnık Aleksandr Dýbov, Aýǵan soǵysynyń ardagerleri, zapastaǵy polkovnıkter: Grıgorıı Kýlıkov, Jeńisbek Súleımenov, Bolat Quramysov, Naýryzbaı batyr aýdany Qorǵanys isteri boıynsha departamenti bastyǵynyń orynbasary zapastaǵy maıor Erjan Alınov, sondaı-aq shekarashy ardagerler men Naýryzbaı aýdany ákimdiginiń ókilderi qatysty.
