Álem chempıonatyna joldama aldy
Qazaqstannyń 14 jasqa deıingi jasóspirimder quramasy tuńǵysh ret álem chempıonatynda baq synaý múmkindigine ıe boldy.
QTF baspasóz qyzmetiniń málimeti boıynsha, Úndistannyń Nıý-Delı qalasynda ótken Azııa/Tynyq muhıt aımaǵy irikteý týrnırinde qazaqstandyqtar úshinshi orynǵa ıe boldy. Qazaqstan jasóspirimder quramasy úshinshi oryn úshin básekede Taılandpen synǵa tústi. Birinshi upaıdy Damır Jalǵasbaı áperdi. Jas qazaqstandyq tennısshi birinshi partııada 2:6 esebimen ese jiberse, ekinshi sette 1:4 esebimen jeńilip jatyp, tarazy basyn ózine aýdara bildi. Úshinshi, sheshýshi partııada esep 3:5 bolǵan mezette taılandtyq tennısshiniń eki matchbolyn paıdalanýyna múmkindik bergen joq. Sosyn taǵy bir breık jasap, jeńisti julyp aldy – 7:5. Budan keıin Zańǵar Nurlanuly qarsylasyn 6:2, 6:1 esebimen tize búktirdi. Esep – 2:0, Qazaqstannyń paıdasynda.
Osylaısha, Qazaqstan jasóspirimder quramasy alǵash ret bıyl kúzde ótetin álem chempıonatynyń fınaldyq kezeńine qatysady. Sonymen qatar eresekter arasyndaǵy Qazaqstannyń erler jáne áıelder quramasy da kúzde uıymdastyrylatyn álem chempıonatynda baq synaıdy.
Jigitter AQSh-ta judyryqtasady
Jýyrda ǵana kásipqoı boksqa aýysqan bokstan ulttyq quramanyń eki ókili, qazaqstandyq Suleimen Promotion kompanııasymen jumys isteıtin Abylaıhan Júsipov pen Ábilhan Amanqul mamyr aıynda AQSh-ta debıýttik jekpe-jekterin ótkizedi.
Eki boksshymyz da orta salmaqta óner kórsetetin jerlesimiz Jánibek Álimhanulynyń (11-0, 7 KO) aldaǵy kezdesýiniń anderkardynda judyryqtasatyny belgili boldy. Bul – 2017 jylǵy álem birinshiliginiń jáne 2018 jylǵy jazǵy Azııa oıyndarynyń kúmis júldegeri, Azııa chempıonatynyń qola júldegeri Ábilhan Amanqul úshin kásipqoı boks álemindegi alǵashqy jekpe-jegi bolsa, ulttyq quramanyń kapıtany, úsh dúrkin álem chempıonatynyń qola júldegeri, Azııa birinshiliginiń qola júldegeri Abylaıhan Júsipovtiń ekinshi aıqasy.
Aıta keteıik, J.Álimhanuly óziniń kelesi kezdesýin 21 mamyr kúni Las-Vegas (Nevada shtaty, AQSh) qalasynda ótkizedi. Onyń qarsylasy – ulybrıtanııalyq Dennı Dıgným (14-0-1, 8 KO). Bul kezdesýde WBO uıymynyń «ýaqytsha» chempıondyq ataǵy sarapqa salynady.
Jappaı júgirýge qatysty
Qorǵanys mınıstrliginiń uıymdastyrýymen Qazaqstan Qarýly Kúshteriniń 30 jyldyǵyna oraı elordada «Otan. Armııa. Jas sarbaz» atty jappaı júgirý ótti.
Alǵash ret ótkizilgen aýqymdy is-sharanyń maqsaty – óskeleń urpaqty sport pen salamatty ómir saltyna baýlý, olardyń ynta-jigerin arttyrý, jastarǵa buqaralyq sportty nasıhattaý. Sol sebepten tózim men jiger kúshin arttyratyn sport túrleriniń keń damýyna atsalysý, deıdi uıymdastyrýshylar.
Jappaı júgirýge Aqmola garnızonynyń áskerı qyzmetshileri, basqa da áskerler men áskerı qurylymdardyń áskerı qyzmetshileri, Nur-Sultan qalasy «Jas sarbaz» qozǵalysynyń, S.Nurmaǵambetov atyndaǵy Áskerı kolledjdiń tárbıelenýshileri qatysty.
