«Sýmen qamtamasyz etý deńgeıin arttyrý úshin kórsetkishteri tómen jáne kósh sońynda qalǵan óńirlerge basym negizde qarajat bólinedi. Osy jyly bul maqsattarǵa naqtylaýdy eskere otyryp, respýblıkalyq bıýdjetten 215 mlrd teńge kózdelgen. Onyń ishinde qalalarda – 120 mlrd teńge jáne aýyldyq eldi mekenderde - 95 mlrd teńge. Bul jyl qorytyndysynda qala halqynyń 98,5 paıyzyn, al aýyl halqynyń 94,7 paıyzyn sýmen jabdyqtaý qyzmetterimen qamtamasyz etýge múmkindik beredi», dedi mınıstr.
Qaıyrbek О́skenbaevtyń dereginshe, elimiz boıynsha barlyǵy 6 302 aýyldyq eldi meken bar, onyń ishinde 4 759-y sýmen jabdyqtaý qyzmetterimen qamtylǵan.
«Atalǵan qyzmet túrimen qamtamasyz etilmegen aýyldardyń 511-inde ortalyqtandyrylǵan sý júıesimen jabdyqtaý jónindegi qurylys jumystaryn jalǵastyrý josparlanyp otyr. Al halyq sany bir myńnan astam aýylda jergilikti bıýdjet qarajaty esebinen keshendi blok-modýlder ornatylady. Onyń ishinde osy jyly 120 aýyldyń turǵyndaryn ortalyqtandyrylǵan sý júıesimen qamtamasyz etý jáne halyq sany az 220 aýylda keshendi blok-modýl ornatý josparlanǵan», dedi ol.
