Adam oı-sanasynyń ózgerýi ońaı emes. Bul taǵdyrly kezeńniń jaýapkershiligi, ashyǵyn aıtaıyq, buǵan deıingi jyldar men ýaqytqa qaraǵanda esh salystyrýǵa kelmeıtin deńgeıge kóterile bastady. Ashyqtyq pen týrashyldyqty saıasatta, ekonomıkalyq máselede jáne áleýmettik, quqyqtyq salada túbegeıli oń ózgerister sıpatynda aıtý sanaǵa sińdi, úmitti oıatyp qana qoıǵan joq, buqaranyń jumylyp, uıysýyna silkinis ákeldi. Ulttyq ózekti máselelerge qyzmet etetin qoǵamdyq uıymdardyń jumysyn jasandylyq ataýlydan arylyp, naqty aıtýǵa týra keledi. Dańǵaza madaq, oryndy-orynsyz jyltyraqqa yńǵaı tanyta berýge áýestik daǵdydan aýlaq bolýǵa shaqyramyz. Mundaı kórinister endi eshkimge abyroı ápermeıdi, osy jaǵdaıdy myqtap eskerýimiz kerek.
Memleket basshysynyń qolǵa alyp otyrǵan saıası reformalary men bastamalary halyqtyń kóńilinen shyǵyp jatqany anyq. Qarapaıym halyq bul iri ózgeristerdi irgeli el bolýdyń jańa kezeńi dep túsinip, qoǵamdy tazartý arqyly damytý qadamdaryn qýattaý ústinde. Árbir otbasy men ujym músheleriniń ádilettilik qaǵıdasyn jan-jaqty qoldaýy jáne árbir otandastarymyz ózi ómir súrip otyrǵan erkin eldiń azamaty retinde ún qatýy erekshe mańyzdy. Bul qajet dese, keshegi zamandarda tarydaı shashylǵan tarıhymyzdy túgendeýge qanshalyqty kúsh salyp kelsek, endi qazaq jurtynyń keleshegi, ǵalamdyq jaǵdaıdyń syn-qaterine qarsy tura bilý úshin qarmanýdyń naǵyz qaharmandyq tanytar, memlekettik negizder men saıası júıeni túbegeıli túzeıtin kún týǵany anyq.
Biz Prezıdenttiń Konstıtýsııaǵa engiziletin ózgerister men tolyqtyrýlardy referendýmǵa usynyp, halyqtyń erkin tańdaýyna berýin osy turǵydan qoldaımyz. Bul kóptiń tilegimen qup alynyp, qabyldanatyn Ata Zańymyzdyń qazirgi qoldanystaǵy nusqasynyń 33 babyna ózgeris engiziletini jáne olar qandaı ózekti, túıindi máseleler ekendigin esepke alsaq, elimizdiń saıası júıesinde túbegeıli betburys bolatynyn anyq ańǵartady.
Memlekettik basqarýdyń jańa modeline kóshýi, aýqymdy ózgeristerdiń maǵynaly, taǵdyrsheshti tustary osyndaı oıǵa jeteleıdi. Áli kúnge deıin ulttyq qundylyqtardy baıyta túsý barysynda «Qazaqqa qandaı ıdeıa, qandaı mádenıet, qandaı ekonomıka kerek?» degen ómirsheń saýaldarǵa jaýapty jantalasa izdeýdi bastan ótkerip kele jatqanymyz ras. Bul kúnderi oı erikti, sóz erikti, bolashaqqa boljam da erikti bolýǵa tıis. Al mundaı qoǵamdyq oı-sana silkinisi eldik senimnen nár alsa, eldiń alǵysy men tereń túsinistigi odan ári kórkeıedi.
Sol eldik zor senim kún ótken saıyn jaqsylyq tileýmen jáne taza peıilmen arta túsýde. Bul qubylystardy aınalamyzdan baıqamaý, ne sezinbeý múmkin emes. Qazirgi el basshylyǵynyń kóp jyl boıy qoǵamǵa renish týǵyzǵan oısyzdyqtardy túbirimen joıyp, kórer kózge zańdy belden basqan ozbyrlardy qatań tártipke shaqyryp jatqany, zań ústemdigin ashyq ornyqtyrý is-áreketteri oń kózqarastardy qalyptastyrýda. Onyń temirqazyǵy – shyndyq, oılylyq pen dáldik, búgingi kún men keleshektiń qamyn sabaqtastyra zerdeleý, ózińdi-óziń syılaý jáne ózgege syılata bilý.
Halyqtan ótken asylyń joq. Endigi jerde elimizdiń ár perzenti qalyń qaýymnyń joǵyn joqtaıtyn, saıası bıikke kóteriletin deńgeıge jetýge tıis. Ár azamattyń ulttyq múddeni basshylyqqa alýyn mindetteýdi júkteý de bekerden-beker kún tártibine qoıylyp otyrǵan joq.
Bul referendým saıası máni jaǵynan búkil quzyretti bir adamǵa qaratyp negizdeıtin joldan tartynyp, kerisinshe memleketti basqarý isine azamattyq qoǵamdy tikeleı qatystyryp, ádiletti Qazaqstan qurýǵa baǵyttalǵan. Týǵan el-jurtymyzdyń ómir súrý sapasyn órkenıetti, naqty ispen jaqsartýdy murat etedi. Sol ımandy da ıbaly halqymyz iriligin tanytyp, kósheli, kórgendi ekenin pash etýge jumylady. Biz osy bederli ýaqytta tek aqıqatqa júginýge jol ashtyq. Bul – adamdardyń kútken ómiriniń basty ólshemi. Áıtpese, jyldar boıy áleýmettik ádildikke qol jetkize almaǵan túrli jaǵdaılar qatty alańdatyp, jurt narazylyǵyn týdyrǵan joq pa edi?!
Elimiz boıynsha bılik pen qoǵam arasyndaǵy qarym-qatynastaǵy shynaıy ózgeristerdiń buqaralyq sıpatqa ıe bola bastaýynyń túpki máni osynda jatyr. Sol sebepti táýelsiz memleketimizdiń jańa órkendi, jańa tarıhı belesin batyldyqpen qunttap jatqan iri saıası bastamalardyń júzege asyp, qutty bolýyn qalaımyz.
Meırambek TО́LEPBERGEN,
Májilis depýtaty
