Qasym-Jomart Toqaev óz sózinde Prezıdenttiń jaqyndary memlekettik qyzmette, kvazımemlekettik sektorda laýazymdy qyzmetter atqarýyna tyıym salynatynyn atap ótti. Bul jańalyq kópshiliktiń kókeıindegisin tap basty desek, qatelespeımiz.
Rasynda da, bul ózgeris barlyq memlekettik apparattyń durys jumys isteýine oń áserin tıgizetini daýsyz. Sonymen qatar osy bir uıǵarym Prezıdenttiń qandaı da bir dárejede sheshim qabyldaıtyn kezinde oń áserin tıgizetini aqıqat. Memleket basshysy bul sheshimdi derbes túrde qabyldap, óziniń halyq aldyndaǵy shynaıy bolmysyn baıqatty.
Elimizde Prezıdent Konstıtýsııaǵa sáıkes azamattardyń quqyqtary men bostandyǵynyń kepili bolyp tabylatynyn eskersek, Memleket basshysynyń jaqyn týystaryn jetekshi qyzmetterge ornalastyrmaýy óte durys ári der kezinde qabyldanǵan sheshim deýge bolady. Sol arqyly halyqtyń senimine ıe bolatyny da shyndyq.
Jalpy, Memleket basshysynyń Jańa Qazaqstandy qurý jolynda qolǵa alǵan barlyq reformalary qoldaýǵa turarlyq. Biz Konstıtýsııalyq sotty qurý arqyly da órkenıet kóshine ileskenimizdi baıqatamyz. Jer máselesine qatysty aıtqan ustanymdary da Qazaqstan halqynyń oıymen úılesim tapty dep aıtýǵa tolyq negiz bar.
Biz quqyqtyq memleketke aınalý jolynda jańa saıası reformalardyń júzege asatynyn kórip otyrmyz. Bul óz kezeginde «Ekinshi respýblıka» qaǵıdattaryna sáıkes keledi. Prezıdent Jańa Qazaqstandy qurý jolynda Ádiletti Qazaqstan ustanymyna aıryqsha nazar aýdaryp otyrǵany qýantty. Qoǵam barlyq máselede ashyqtyq, ádildik pen zańdylyqtyń bolǵanyn qalaıdy. Prezıdent aıtqan bastamalar baıandy bolǵan kezde, biz shyn máninde de zaıyrly, quqyqtyq memleketke aınalamyz. Al Konstıtýsııaǵa engiziletin ózgeristerge baılanysty referendým ótkizý týraly sheshim der kezinde qabyldandy. Bul bıliktiń halyqpen sanasatynyn kórsetedi. Sol baǵytta atqarylatyn barlyq jumys jemisti bolsa degen tilek kókeıde tur.
Álibek TÁJIBAEV,
«Eýrazııalyq monıtorıng» saraptamalyq zertteýler ortalyǵynyń dırektory
