Oblystyq jolaýshylar kóligi jáne avtomobıl joldary basqarmasynyń basshysy Qanat Qashkırovtiń aıtýynsha, bıyl óńirde 265 shaqyrym joldy jóndeý josparlanǵan. Baıqaǵanymyzdaı, joldyń tozýy jospardan eki ese artyq bolyp tur. Bulaı jalǵasa berse, sapasyz joldardyń sany artatyny anyq. Kólik qozǵalysy da jyl saıyn artyp kele jatqanyn esten shyǵarmaǵan jón.
– Oblys aýmaǵynda jalpy paıdalanymdaǵy avtomobıl joldary jelisiniń uzyndyǵy – 3 842 shaqyrym. Munyń ishinde oblystyq mańyzy bar avtomobıl joldary 1 010 shaqyrym bolsa, aýdandyq mańyzy bar avtomobıl joldary 2 832 shaqyrymǵa teń. Byltyr oblystyq jáne aýdandyq mańyzy bar joldardy kúrdeli jáne ortasha jóndeý boıynsha 9 mlrd 518 mln teńge qarajatqa 41 joba júzege asyryldy. Qurylys-montajdaý jumystarynyń sapasyn baqylaý sheńberinde qalalar men aýdandar ákimdikteri, jolaýshylar kóligi jáne avtomobıl joldary basqarmasy Jol aktıvteri sapasy ortalyǵymen jalpy somasy 117 mln teńgege shart jasady. Sapany baqylaý kezinde 5 kemshilik anyqtalyp, 497 materıaldyń synamasy alyndy. Qazirgi tańda barlyq aqaýlar joıyldy. Bıyl 9 mlrd 240 mln teńge somasyna jalpy uzyndyǵy 264 shaqyrym oblystyq jáne aýdandyq mańyzy bar avtomobıl jolyn ortasha jóndeý boıynsha 27 jobany iske asyrý josparlanýda, – deıdi basqarma basshysy.
Onyń ishinde turǵyndar uzaq kútken jobalar da bar. Máselen, GRES-1 ýchaskesi – Basqamys arasyndaǵy jol jóndelse, Aqtoǵaı aýdanynyń turǵyndary úshin Ekibastuz qalasyna deıingi joldyń uzaqtyǵy eki esege jýyq qysqarmaq. Sáıkesinshe, jolaýshylardyń Ekibastuzǵa jáne odan ári Nur-Sultanǵa ótý trafıgin qysqartýǵa múmkindik bar. Búginde 70 km shaqyrym joldyń 40 shaqyrymynda jumys júrip jatqan kórinedi. Jol jumystarynyń sapasyn beıindi basqarma ǵana emes, oǵan qosa qoǵamdyq uıymdar men tehnıkalyq qadaǵalaý arqyly baqylaý júrgizilmek.
Oblys ákimi Ábilqaıyr Sqaqov jyl saıyn joldy jóndeýge qomaqty qarajat bólinse de, jaqsy kórsetkishke jetý qıyndaı túskenin aıtady. «Bul – oblys ortalyǵyndaǵy jylý júıesi sııaqty. 25 shaqyrym jóndeý kerek, biz bes shaqyrym jóndeımiz. Al jyl saıyn tozǵan bóliginiń úlesi arta beredi. Bul – qarjy qumǵa ketti degen sóz. Onyń aldyn alý úshin ár aýdanmen jeke jumys isteý kerek», dep aımaq basshysy jolǵa jaýapty basshylarǵa tapsyrma berdi.
Belgili bolǵandaı, bıylǵy josparǵa kireberis joldardy jóndeý jumystarynyń basym bóligi enbeı qalǵan. Qanat Qashkırovtiń aıtýynsha, ol joldarǵa az qarjy jumsalady. Aýyldarǵa kiretin joldyń kóbi 1,5-2 shaqyrym ǵana bolǵandyqtan, onyń jóndeý jumysy 100 mln teńgeden az turady. Al tıisti mınıstrlik kóp qarjy jumsalatyn jobalarǵa ǵana basymdyq beredi eken.
Ábilqaıyr Sqaqov basymdyq bulaı rettelmeý kerek ekenin aıtty. Mınıstrlikke hat daıyndap, óz usynystaryn bildirmek. Áıtpese, búginde aýyldarǵa kireberis joldardy jóndeýge arnalǵan jalpy quny 2 mlrd teńgeni quraıtyn 22 joba daıyn tur. Respýblıkalyq bıýdjetten qarajat bólinbese, jobalardy oblystyq bıýdjet arqyly qarjylandyryp, 2 jylǵa bólip tyndyrýǵa tyrysyp kórmek.
