2016 jyly 7 sáýirde Qaraǵandy oblysyndaǵy Qarabas eldimekeninde 6505 áskerı bóliminiń kezekti oqý-jattyǵýy ótip jatty. Buǵan áskerge on aı buryn shaqyrylǵan jaýyngerler qatysty. Jas sarbazdar oǵan deıin avtomat pen tapanshadan oq atyp, jaýyngerge kerekti mashyqtardy meńgergen bolatyn. Endi olar jarylǵysh granata laqtyryp úırenýge kelgen edi. Quramanyń shtab bastyǵy polkovnık Qaırat Úmbetovke sol kezde oqý-daıyndyqqa jaýapty maman retinde qaýipsizdikti qadaǵalaý mindetteldi. Alǵashqy bolyp Tarazdan kelgen qatardaǵy jaýynger Abzal Sultanqulov RGD-5 granatasyn qolǵa aldy. Pármen berilgen soń ol granatasyn qulashtap laqtyrdy. Alaıda granatany laqtyrýǵa laıyq kúshtiń jetkiliksiz bolǵany ma, ol alysqa ushpaı, qarsy soqqan jeldiń ekpinimen okoptyń jıegine, úıilgen topyraqqa tústi. Sodan ol domalap, sarbaz ben ofıser turǵan tusqa jetti. Tártip boıynsha granata laqtyrǵannan keıin sarbaz turǵan jerinde otyra qalý kerek. Abzal da qarýyn ustap, otyra qaldy. Jaýynger ózi laqtyrǵan granatanyń tabanynyń astyna túskenin bilmegen edi. Endi shalt qımyldasa, ol 3-4 sekýnd ishinde jarylady. Sol sátte boıyndaǵy bar jigerin jınap, qas-qaǵym sátte sardar sarbazdy ıtere salyp, ony keýdesimen jaýyp úlgeredi. Nátıjesinde jarylys saldarynan polkovnık Úmbetov aýyr jaraqat, denesine otyzdan asa jarqynshaq aldy. Al sarbaz aman qaldy.
Osy asqan erligi úshin QR Tuńǵysh Prezıdenti – Elbasynyń Jarlyǵymen 2016 jyldyń 3 mamyrynda Qaırat Úmbetovke Altyn juldyz jáne «Otan» ordenimen birge, «Halyq qaharmany» ataǵy berildi.
Anyqtama: Úmbetov Qaırat Jarylqasynuly 1977 jyly 10 qyrkúıekte О́zbek KSR Tashkent oblysy Shyrshyq qalasynda dúnıege kelgen. Lenın ordeniniń Shyrshyq joǵary tankili komandalyq-ınjenerlik ýchılıshesin aıaqtaǵan.
2001 jyly aǵa leıtenant sheninde alǵashqy qyzmet jolyn 6506 áskerı bóliminde rota komandıri bolyp bastaıdy.
2007-2016 jyldar aralyǵynda Pavlodar, О́skemen, Qaraǵandy qalalarynda rota, batalon komandıri, áskerı bólim komandıriniń orynbasary ispetti qyzmetterdi sátti jalǵastyrady.
QR Tuńǵysh Prezıdenti – Elbasy atyndaǵy Ulttyq Qorǵanys ýnıversıtetin támamdaǵan soń ózi qyzmetiń bastaǵan 6506 áskerı bóliminiń komandıri bolyp taǵaıyndalady.
2020 jyldyń 17 qyrkúıeginen bastap Qazaqstan Respýblıkasy Ulttyq ulany «Batys» óńirlik qolbasshylyǵy qolbasshysynyń birinshi orynbasary – shtab bastyǵy laýazymyn atqarady.
