Eshkim de eskerýsiz qalmaıdy

Premer-Mınıstrdiń birinshi orynbasary Baqytjan Saǵyntaev At­basarda sý tasqynynyń oryn alýyna baılanys­ty óńirge ju­mys saparymen keldi. Ol qala turǵyn­darymen kezdesip, sý shaıǵan tur­ǵyn úılerde, kósheler men kólik ınfra­qurylymdarynda boldy. – Maǵan oblys ákimdiginen be­rilgen derek boıynsha 44 úı qalpyna keltirýge jaramaıdy. Baspanasyz qalǵandar úshin jańa turǵyn úıler salynatyn bolady, zardap shekken ózge azamattarǵa komıssııanyń qorytyndy sheshimimen tıisti qarjy bólinedi. Eshkim de nazardan tys qalmaıdy. Biz bul jaǵdaılardy tez arada sheshýge tyrysamyz. Memleket basshysy Atbasardaǵy jaǵdaıdy baqylaýda ustap otyr, – dedi ol jurt­shylyqpen kezdesýde. Baqytjan Saǵyntaev Atba­sar­daǵy jedel shtabta  Tótenshe jaǵdaılar mınıstri Vladımır Bojko, Aqmola oblysynyń ákimi Qosman Aıtmuhametov,  Qarjy, Kólik jáne kommýnıkasııa vıse-mınıstrleri Berik Sholpanqulov, Mereke Pishembaev, О́ńirlik damý mınıstrliginiń komıtet tóraǵasy Vladıslav Gallıev pen Qorshaǵan orta jáne sý resýrstary mınıstrligi komıtet tóraǵasynyń mindetin atqarýshy Bolat Beknııazdyń qaty­sýymen májilis ótkizdi. Onda oblys ákimi Qosman Aıtmuhametov pen Tótenshe jaǵdaılar mınıstri Vla­dı­mır Bojkonyń aǵymdaǵy jaǵdaı­larǵa qatysty esepteri tyńdaldy. –Turǵyndarǵa medısınalyq jáne psı­ho­logııalyq kómek kór­setilýde, –dedi óńir bas­shysy Q.Aıt­muhametov. – Aýlalar men kó­shelerdi sýdan tazartý, tártipke keltirý ju­mys­tary júrgizilýde. Búgingi kúni eva­kýa­sııa­lyq pýnktte 19 adam turyp jatyr. Osyǵan qatysty, Premer-Mınıstrdiń birinshi orynbasary óńirde sý tasqynynan belgili dárejede kúrdeli jaǵ­daı qalyptasqanyn atap ótti. Úkimet pen oblys ákimdigi tarapynan zardap saldaryn joıý jumystary júrgizilýde. Qazirgi tańda tirshilikti qamtamasyz etý men qaýipsizdik sharalary qatań baqylaýda ustalýy qa­jet. Sondaı-aq, Baqytjan Saǵyn­taev tıisti mınıstrlikter men oblys ákimdigine tabıǵat apatynan zardap shekken ǵı­ma­rattardy qalpyna kelti­rýge jum­salatyn qarjy bólinýi jó­ninde usynys daıyndaýdy tapsyrdy. Oblys ákimi Qosman Aıt­muhametovtiń málimdeýinshe, alǵashqy kezekte jarty mıl­lıard teńge qarjy qajet. Onyń esepteýinshe, 490 mıllıon teńge 44 jańa turǵyn úı salýǵa jáne 10 mıllıon teńge ınfraqurylymdy qalpyna keltirýge jumsalmaq. Zertteý jumystarynan keıin sýda qalǵan taǵy da 146 úıge qatysty qosymsha esep júrgiziledi. Úkimet basshysynyń birinshi orynbasary B.Saǵyntaev qarjy tıisti qujattamalyq negizge saı bólinetinin aıtty. Búgingi kúni Atbasar qala­synda apat saldaryn joıý ju­mysymen 500 adam, 87 tehnıka men sý sorǵysh quraldar táý­lik boıy aınalysýda. Kómek qory qurylyp, arnaıy esepshot ashylǵan. Baqbergen AMALBEK, «Egemen Qazaqstan». Aqmola oblysy.