Qytaıda indet juqtyrýdyń 4 696 jańa jaǵdaıy tirkeldi. Sonyń ishinde Shanhaıda – 4 269, Beıjińde – 70, Henan provınsııasynda 79 adamnan vırýs anyqtaldy. Osyǵan oraı Azııa Olımpıadalyq keńesi qyrkúıekte Hanchjoýda ótetin Azııa oıyndaryn keıinge shegerdi.
Indettiń órshýi ásirese, Shanhaı óńirine aıtarlyqtaı áser etti. Sońǵy bir aptaǵa sozylǵan karantın saldarynan 25 mln turǵyndy azyq-túlikpen qamtý qıyn bolyp tur. Qala bıligi aıtylyp jatqan syn men narazylyqqa qarsy shara qoldana almaı otyr.
QHR tóraǵasy Sı Szınpın Qytaıdyń eń joǵary sheshim qabyldaıtyn organy bolyp tabylatyn jeti músheden turatyn Saıası bıýronyń turaqty komıtetiniń aldynda sóılegen sózinde Shanhaıdaǵy indetke qatysty pikir bildirdi. Ol sheneýnikterdi koronavırýspen kúresýde tabandylyq tanytýǵa shaqyrdy. «Biz Ýhandy qorǵaýda indetpen kúresip, jeńiske jettik. Qazir biz Shanhaıdy qorǵaý úshin kúresip jatyrmyz, ony da jeńe alamyz», dedi Sı Szınpın.
Densaýlyq saqtaý sarapshylary Qytaıda vaksınalaý men revaksınalaý deńgeıi tym tómen ekenin aıtyp otyr. Sonymen qatar eldiń túrli aımaqtarynda densaýlyq saqtaý resýrstarynyń birkelki emes ekenin alǵa tartady. Muny Qytaı bıligi de rastap otyr. Sondyqtan shekarany aıqara ashýǵa ázir ruqsat berilmeıdi. Ekonomıster qatań shekteýler jalǵasa berse, eldiń ekonomıkalyq jaǵdaıy nasharlaıtynyn aıtady.
Kanadalyq ımmýnolog Djon Bell BBC Radio 4 arnasyna álem qalypty jaǵdaıǵa kóp uzamaı oralady degen pikir bildirdi. Onyń senimdi jaýap berýi beker emes. О́ıtkeni Oksford ýnıversıtetiniń professory AstraZeneca kompanııasymen birlesip, koronavırýsqa qarsy vaksına ázirlegen toptyń múshesi.
«Vaksınalardyń áseri óte kúshti. Ony saldyrtqan adamdarǵa qaýip joq. Qazir koronavırýstan qaıtys bolyp jatqan adamdar ótken shildeden beri ekpe almaǵan. Bul qaıǵyly jaǵdaı», deıdi ol.
Onyń aıtýynsha, qarttar men ımmýnıteti tómen adamdarǵa tóngen qaýip áli de seıilgen joq. Sondyqtan 65 jastan asqan adamdar jáne ımmýndyq júıesi nashar adamdar taǵy da ekpe saldyrǵany jón dep esepteıdi.
