Kásipodaqtar federasııasy Qazaqstan eńbekkerleriniń eń iri birlestigi retinde Eńbek adamynyń quqyqtary men zańdy múddelerin qorǵaı otyryp, qoǵamdaǵy áleýmettik ádilettilikti damytýǵa óz úlesin qosýda.
Búginde el Prezıdenti Qasym-Jomart Toqaev júrgizip otyrǵan qoǵamdy jańǵyrtý baǵyty barlyǵymyzǵa elimizdiń saıası júıesinde oryn alyp jatqan tarıhı ózgeristerdiń qatysýshysy bolýǵa biregeı múmkindik beredi.
Biz Memleket basshysynyń Qazaqstan Konstıtýsııasyna ózgerister men tolyqtyrýlar engizý boıynsha respýblıkalyq referendým ótkizý týraly bastamasyn qoldaımyz.
Qazaqstan Respýblıkasy Kásipodaqtar federasııasy halyqty durys aqparattandyrýǵa jáne elimizdiń azamattaryna usynylyp otyrǵan reformalardy túsindirýge belsendi qatysý nıetin bildiredi.
Zańnamalyq ózgeristerge jalpyhalyqtyq daýys berý – árbir qazaqstandyqtyń saıası baǵytty qalyptastyrýǵa qatysý quqyǵyn jáne óz eliniń bolashaq taǵdyry úshin jaýapty sheshim qabyldaý quqyǵyn aıqyndaıtyn tarıhı ádilettilik aktisi. Bul Jańa Qazaqstandy qurý jolyndaǵy mańyzdy qadam.
Negizgi Zańǵa usynylyp otyrǵan ózgerister men tolyqtyrýlar árbir azamattyń negizgi quqyqtary men kepildikterin, qoǵamdaǵy turaqtylyq pen birlikti qorǵaýǵa baǵyttalǵan.
Búkil álem úshin qıyn-qystaý kezeńde qazaqstandyqtar birigip, azamattyq ustanymyn tanytyp, aldaǵy referendýmǵa belsene qatysýǵa tıis.
О́tken jyldardyń tájirıbesi búkil qoǵamnyń birigýi men sanaly qoldaýy ǵana demokratııalyq ózgerister men áleýmettik ádilettilik qaǵıdalaryn alǵa bastyrýdyń negizi bola alatynyn kórsetti.
Kásipodaqtar birlesken kúsh-jigermen biz laıyqty bolashaqqa jáne barsha qazaqstandyqtardyń ál-aýqatyn arttyrýǵa baǵyt-baǵdarymyzdy jalǵastyratynymyzǵa senimdi.
Qazaqstan Respýblıkasy Kásipodaqtar federasııasynyń atqarý komıteti
