Bul joly Qalqaman shaǵyn aýdanyndaǵy №7 aýrýhana dárigerleri 26-27 sáýir kúnderi semizdikten qınalyp júrgen 4 pasıentke laparoskopııalyq barıatrııa jasady. Olardyń biri – 40 jastaǵy áıel. Jyldar boıy semizdikpen alysý nátıje bermegen soń operasııa jasatýǵa bel býǵan. Artyq maıdyń saldarynan salmaǵy 103 kıloǵa jetken áıel sátti jasalǵan operasııadan keıin birden №2 hırýrgııa bólimshesine aýystyryldy. Qazir pasıenttiń jaǵdaıy bir qalypty, óz betinshe júrip-tura alady.
«Laparoskopııalyq barıatrııa – artyq salmaqty rettep, semizdik saldarynan bolatyn arterıaldy gıpertenzııa, júrektiń ıshemııalyq aýrýy syndy ilespe dertterdi emdeýge múmkindik beretin zamanaýı ádis. Operasııanyń bul túri bizdiń klınıkada 2019 jyldan beri jasalyp keledi. Birlesken operasııany aýrýhananyń hırýrgııa bólimi meńgerýshisi Musa Sahıpovpen birge belgili hırýrg Oral Ospanov jasap júr», deıdi №7 aýrýhananyń ókilderi.
Dáriger Musa Sahıpovtiń aıtýynsha, operasııa adamnyń jasyna, qosymsha aýrýlary men zat almasý prosesindegi erekshelikterge qaraı jasalady. Manıpýlıasııadan keıin pasıent shamamen 15-ten 80 kıloǵa deıin salmaq tastaıdy.
Mamandar deregine súıensek, qazirgi tańda operasııadan keıin jalǵanǵan ishekterdiń júrmeýi, anastomozda jara paıda bolýy syndy asqynýlar sany azaıǵan. Sonymen qatar operasııa uzaqtyǵy, aýrýhanada jatý merzimi de qysqarǵan. Zamanaýı qondyrǵylar pasıenttiń tez arada aıaqqa turýyna múmkindik beredi.
Kórsetilimderge baılanysty jáne josparly túrde jasalatyn operasııanyń quny – shamamen 600 myń teńge. Joǵary tehnologııaly operasııa aqysy MÁMS paketi arqyly tólenedi, biraq pasıent operasııaǵa qajetti bir rettik materıaldardy ózi satyp alady.
Mamandar artyq salmaq ateroskleroz, gıpertonııa, ınfarkt, ınsýlt, qant dıabeti, asqazan-ishek aqaýy, artrıt, reprodýktıvtik júıe qyzmetiniń buzylýy syndy aýrýlarǵa ákep soqtyratynyn qaperge salady. Hırýrgııalyq operasııa jasaý týraly sheshim dári-dármekpen emdeý nátıje bermegen kúrdeli jaǵdaılarda ǵana qabyldanady.
Qazirgi tańda ómir súrý salty men ishken-jegenge baılanysty semizdik álemdik deńgeıdegi máseleniń biri. Ulttyq qoǵamdyq densaýlyq saqtaý ortalyǵynyń dereginshe, halqymyzdyń 20%-dan astamy semizdikke shaldyqqan.
ALMATY
