Memlekettik bajdy qalaı qaıtarýǵa bolady

Memlekettik baj – ýákiletti memlekettik organdardyń nemese laýazymdy adamdardyń zańdyq máni bar, onyń ishinde qujattardy (olardyń kóshirmelerin, telnusqalaryn) berýmen baılanysty áreketter jasaǵany úshin alynatyn, bıýdjetke tólenetin tólem.

Memlekettik bajdy qaıtarý Salyq kodeksimen jáne Qazaqstan Respýblıkasy Qarjy mınıstriniń 2018 jylǵy 27 aqpan­daǵy №306 buıryǵymen bekitilgen Jeke shottaryn júrgizý qaǵıdalarymen retteledi.

Artyq tólengen memlekettik baj

Memlekettik bajdyń tólengen somalary – júzege asyrylýy úshin osyndaı memlekettik bajdy tóleý talap etiletin áreket­terdi jasamaýy faktisin tıisti ýáki­letti memlekettik organ elektrondy baza ar­qyly nemese qaǵaz túrinde rastaǵan jaǵ­daıda, artyq tólengen bolyp tanylady. Salyq tóleýshiniń tıisti qujattardy bergenge deıin áreketter jasaýdan bas tartýy áreketterdi jasamaý faktisi retinde tanylady.

Salyq organy memlekettik bajdyń ar­tyq tólengen somasyn qaıtarýdy sa­lyq tóleýshi usynǵan ótinishi jáne tıis­ti memlekettik organnyń qaıtarýdyń zań­dy­lyǵyn rastaıtyn qujaty negizinde júrgizedi.

Memlekettik bajdyń artyq tólengen somasyn qaıtarýdy onyń tólengen jeri boıynsha salyqtyq ótinish berilgen kúnnen bastap bes jumys kúni ishinde salyq tóleýshiniń banktik shotyna júrgizedi.

Qate tólengen memlekettik baj

Memlekettik bajdyń qate tólengen somasy retinde mynalar tanylady:

1) tólem qujatynda: salyq tóleýshiniń sáıkestendirý nómiri durys kórsetilmegen; salyq organynyń sáıkestendirý nómiri durys kórsetilmegen; tólemniń mátindik maqsaty tólem maqsatynyń kodyna nemese kiristerdiń bıýdjettik synyptamasynyń kodyna sáıkes kelmeıdi;

2) ekinshi deńgeıdegi bank nemese bank operasııalarynyń jekelegen túrlerin júzege asyratyn uıym salyq tóleýshiniń tólem qujatyn qate oryndaǵan;

3) aqsha jiberýshi – salyq tóleýshi tirkeý esebinde turmaǵan salyq organyna tólem júrgizgen;

4) aqsha jiberýshi – salyq tóleýshi memlekettik baj tóleýshisi bolyp tabylmaıdy.

Memlekettik bajdyń qate tólengen somasy mynadaı qujattar usynǵan jaǵdaıda qaıtarylady:

1) salyq tóleýshiniń salyqtyq ótinishi;

2) ekinshi deńgeıdegi banktiń nemese bank operasııalarynyń jekelegen túrlerin júzege asyratyn uıymnyń ótinishi;

3) qate faktisi anyqtalǵan jaǵdaıda, salyq organy jasaǵan memlekettik bajdyń qate tólengen somasynyń týyndaý sebepteri týraly hattama.

Salyq tóleýshiniń salyqtyq ótinishi, ekinshi deńgeıdegi banktiń ótinishi usynylǵan jáne memlekettik bajdyń qate tólengen somasy túsken kúnnen bastap bes jumys kúni ishinde qaıtarym júrgiziledi.

Osylaısha, memlekettik bajdyń artyq/qate tólengen somasyn qaıtarý úshin tólem júrgizilgen oryn boıynsha memlekettik kiris­ter organyna belgilengen nysandaǵy sa­lyqtyq ótinishti (QR QM-niń 2018 jyl­ǵy 12 aqpandaǵy №160 buıryǵynyń 15-qo­symshasy) jáne qaıtarýǵa negiz bolyp tabylatyn qujattar berilgen ýákiletti mem­lekettik organnyń rastaıtyn qujatyn usyný qajet.

Sonymen qatar memlekettik bajdyń artyq/qate tólengen somasyn qaıtarý júr­gizýge salyqtyq ótinishti elektrondy túrde Memlekettik kirister komıtetiniń «Salyq tóleýshi kabıneti» web-qosymshasy, egov.kz portaly, «e-Salyq Azamat» mobıldi qosymshasy arqyly rastaıtyn qujatpen qosa joldaýǵa bolady.