«Qazaqstandyq ǵalym áıelder» qoǵamdyq birlestigi ǵylym men qoǵamda: zamanaýı tulǵa damýynyń etnomádenı negizderi» atty respýblıkalyq ǵylymı-praktıkalyq forým ótti. Forýmǵa qatysýshylar zamanaýı tulǵa damýynyń qaınar kózderi, ulttyq sanany qalyptastyrýdaǵy ana tiliniń, tól mádenıetiniń jáne otbasynyń róli, jas urpaqtyń ulttyq qundylyqtarǵa degen zamanaýı kózqarasy syndy máselelerdi talqylandy.
Jıynda sóz alǵan Ǵylym komıteti tóraǵasynyń orynbasary Dýman Orynbekov Qazaqstanda 9 738 áıel otandyq ǵylymnyń damýyna óz septigin tıgizip júrgenin jetkizdi.
«Qazaqstandaǵy ǵalym áıelderdiń róli biz úshin joǵary. Otandyq ǵylymdy damytý árqashan mınıstrliktiń basty nazarynda. Statıstıkalyq málimetterge súıensek, Qazaqstanda jalpy ǵalymdardyń 54%-yn áıelder quraıdy. Bul – jaqsy kórsetkish. Elimizdegi ǵalym áıelderdiń basyn qosyp, osyndaı sharalar ótkizetin uıymdardyń bar bolǵanyna qýanyshtymyz. Ǵylymdaǵy áıelder qaýymy árqashan talantty, kreatıv jáne olar ózekti ári mańyzdy jobalardy júzege asyryp keledi. Serpindi ǵylymı ázirlemeler jasaýǵa sizderdegi áleýettiń jetetinine, elimizdiń ekonomıkasyn kóterýge úles qosatyndaryńyzǵa senimdimin», dedi D.Orynbekov.
Sondaı-aq forýmda «Qazaqstandyq ǵalym áıelder» qoǵamdyq birlestiginiń bes jylda atqarǵan jumysy baıandaldy. Qazaqstandyq ǵalym áıelder qoǵamynyń prezıdenti Tańat Aıapovanyń aıtýynsha, uıym ǵylymdaǵy áıelderdiń orny men mańyzyn aıqyndap kórsetý, bolashaq urpaqqa basty qundylyqtardy ártúrli is-sharalar arqyly jetkizýdi kózdeıdi.
«О́skeleń urpaqtyń sanasyna ulttyq qundylyqtardy sińirýge atsalysý bizdiń mindetimiz dep sanaımyn. Elimizde ǵalymdarǵa qoldaý kórsetilip keledi. Áıel ǵalymdar jaıly ensıklopedııanyń ekinshi tomy daıyndalyp jatyr, ony jastarǵa, PhD doktorlarǵa arnaımyz. Búginge deıin magıstranttardy qoǵamdyq birlestikke tartý erte dep oılaǵan edim. Biraq aldaǵy ýaqytta jastardy birlestikke tartý, qatarymyzǵa ártúrli mamandyq boıynsha magıstrlerdi qosýdy josparlap otyrmyz. Qoǵam múshelerine úlken rızashylyǵymdy bildiremin. Búkil álem Qazaqstanda áıel ǵalymdar bar ekenin bilýi tıis», dedi professor T.Aıapova.
