Erler básekesinde 73 kılo salmaqta kúsh synasqan Alekseı Chýrkın kúmis medaldy moınyna ildi. Qossaıystyń qorytyndysy boıynsha ol 329 (146+183) kılolyq ziltemirdi tik kóterdi. Onyń basty qarsylasy Rızkı Djýnıansıa edi. Indonezııa sportshysynyń osy jarysqa keremet babynda kelgeni birden ańǵaryldy. Jattyǵýdyń eki túri boıynsha da minsiz óner kórsetken Rızkı Chýrkınnen 12 kılo artyq salmaqty eńserip, bas júldeni qanjyǵasyna baılady. Qola medaldy amerıkalyq Raıana Genrı Grımsland ıelendi.
Qazaqstan quramasynyń qorjynyna ekinshi júldeni Aısamal Sansyzbaeva saldy. +87 kılo salmaqta óner kórsetken qazaq qyzy 252 (112+140) kılolyq nátıjemen úshinshi orynǵa turaqtady. Ol tek Ońtústik Koreıanyń qos aýyr atleti – Pak Hejen (120+161) men Kım Hennen (108+145) qalyp qoıdy. О́kinishke qaraı, ózge otandastarymyzdyń eshbiri jeńis tuǵyryna kóterile alǵan joq.
Áıelder arasyndaǵy jarystyń jalpykomandalyq esebinde Meksıka quramasynyń mereıi ústem boldy. Olar 1 altyn, 2 kúmis jáne 1 qolany oljalady. Ekinshi orynda – Úndistannyń órenderi. Olar túrli tústi medaldardyń árqaısysyn bir-birden ıelendi. Qorjynynda 1 altyn men 1 kúmisi bar Túrkııa men Ońtústik Koreıa úshinshi jáne tórtinshi oryndardy ózara bólisti. Erler saıysynda Armenııanyń (2+2+1) aldyna eshkim túse almady. Ekinshi orynda – Ýkraına (2+0+1). Túrkııa (1+2+1) úshinshi satyǵa jaıǵassa, О́zbekstannyń (1+1+0) ziltemirshileri tórtinshi orynǵa taban tiredi.
