Búgin, 15 sáýir kúni Astanadaǵy Ortalyq kommýnıkasııalar qyzmetinde básekege qabilettilik, ıntegrasııalyq úderis, Eýrazııalyq ekonomıkalyq odaq tóńireginde brıfıng ótti. Oǵan Qazaqstannyń Azamattyq alıansynyń prezıdenti Nurlan Erimbetov pen «Turan» ýnıversıtetiniń rektory Rahman Alshanov qatysty. Bul týraly egemen.kz tilshisi habarlady.
Jıynda sóz alǵan Nurlan Erimbetov: «Búginde Eýrazııalyq ekonomıkalyq odaqqa qatysty san túrli, san qıly pikirler beleń alýda. Men bul jerde mynany aıtar edim: biz búginde úlken básekelestik ortaǵa enip baramyz. Al básekeli ortaǵa kirý ózimizge degen talapty kúsheıtedi, damýdy yntalandyrady. Osy oraıda, men Eýrazııalyq ekonomıkalyq odaqqa degen kózqaras máselesine tek bıznes turǵysynan, sheshim qabyldaıtyndardyń kózqarasy turǵysynan ǵana emes, tutynýshylardyń kózqarasy turǵysynan toqtalǵym keledi», - dedi.
«Integrasııa meniń oıymsha, ultty biriktiredi. Eger buryn meni elimizdiń bank júıesi, bıznesi sonshalyqty oılandyrmasa, qazirgi tańda bıznes, kásiporyndar, jumys berýshiler máseleleri alańdatady. Sebebi, biz shynymen de básekelestik ortaǵa enip baramyz. Bizdiń bıznesimizge ashylatyn múmkindikter mol. Bizge jańa óndirister, zaýyttar men tehnologııalar keledi. Osyǵan oraı, kadrmen qamtý máselesi týyndaıdy. Bizdiń naryǵymyzǵa keletin jańashyldyqtarmen básekege túse alamyz ba? Bizdi osy másele, ıaǵnı úlken naryqta qalaı ómir súretinimiz, eń aldymen, oılandyrýy kerek. Meniń oıymsha, Eýrazııalyq ekonomıkalyq odaq Dúnıejúzilik saýda uıymyna qaraı jasaıtyn alǵashqy qadamymyz», - dedi N.Erimbetov óz sózinde.
Rahman Alshanov: «Shynymen de, sońǵy bir aıdyń ishinde osy másele kóp talqyǵa túsýde. «Osy kerek pe, kerek emes pe?», «Egemendikke nuqsan keltire me, joq pa?» degen turǵyda suraqtar týyndady. Ol – zańdy. Sebebi, biz ıntegrasııany kóp aıtatyn, kóp talqylaıtyn boldyq. Máselen, biz kómir shyǵaramyz, temir óndiremiz. Alaıda, onyń barlyǵy syrtqa ketip jatyr. О́zimizde 10 paıyzyn paıdalansaq, qalǵany shetel asýda. Demek, biz syrttyń suranysyna táýeldimiz», - degen oıdyń arqaýyn shıratty.
«Búgingi tańda 184 elmen áriptestik qarym-qatynas ornatqan ekenbiz. Eýropanyń Andora, Monako sııaqty kishkentaı elderi Qazaqstanmen baılanysta. Qazir Paragvaı, Ýrýgvaı sekildi elder elimizge jylqy etin ákelip jatyr. Iаǵnı, jylqy ósiretin elimizge. Al Amerıka taýyq etin ákelýde. Iаǵnı, barlyǵy óz taýarlaryn ótkizip jatyr. Bir ǵana Qytaıdyń ózinde Qazaqstannyń kiris-shyǵys taýar aınalymyn baqylap, zertteıtin 14 ǵylymı-zertteý ınstıtýty bar eken. Al mundaı qazaqstandyq ortalyqtar bar ma? Sondyqtan, bizge osyndaı ekonomıkalyq saraptama júrgizip otyratyn zertteýler kerek. Al ıntegrasııaǵa keler bolsaq, biz bıdaıdy jalǵyz ózimiz tutynbaımyz, sonsha kómirdi paıdalanbaımyz. Bizge syrttan alatyn elder de kerek. Mine, bul ıntegrasııanyń bir kórinisi», degen oıyn jetkizdi. Onyń aıtýynsha, búginde álem kúrdelenip, álemdik saýda-sattyqtyń mólsheri ulǵaıǵan. «Demek, bizge ıntegrasııalyq úderis, senimdi seriktester qajet. Al biz básekelestikke daıyn bolǵanymyz jón», - R. Alshanov budan ári.
Láıla Edilqyzy.
Derekkóz: egemen.kz.
