«Bıylǵy 4 aıdyń qorytyndysy boıynsha memlekettik bıýdjetke 5 trln 93 mlrd teńge kiris tústi nemese jospar 108,6%-ke oryndaldy. Respýblıkalyq bıýdjetke 3,4 trln teńgege jýyq qarajat tústi nemese jospar 101,1%-ke oryndaldy», dedi Jamaýbaev Úkimet otyrysynda.
Kirister boıynsha jospar 36 mlrd teńgege, onyń ishinde salyqtar - 24 mlrd teńgege, salyqtyq emes túsimder – 12 mlrd teńgege asyra oryndalǵan.
Salyqtar boıynsha asyra oryndaýdyń negizgi somalary korporatıvtik tabys salyǵyna, shıki munaıǵa eksporttyq kedendik bajǵa, oıyn bıznesine salynatyn salyqqa jáne paıdaly qazbalardy óndirýge salynatyn salyqqa tıesili boldy.
«Korporatıvtik tabys salyǵy boıynsha, 2021 jylǵy qańtar-sáýir aılarymen salystyrǵanda bıylǵy 4 aıda 686 iri salyq tóleýshi boıynsha avanstyq tólemder somasy 81,3%-ke nemese 282 mlrd teńgege ulǵaıdy. Iri taý-metallýrgııa kompanııalaryna qatysty salyqtyq ákimshilendirý boıynsha júrgizilip jatqan is-sharalar bar. Jalpy alǵanda, bıýdjetke qosymsha 303 mlrd teńge, onyń ishinde salyqtyq ákimshilendirý sharalary esebinen 29 mlrd teńge tústi», dep túsindirdi mınıstr.
Shıki munaıǵa eksporttyq kedendik baj boıynsha jospardyń asyra oryndalýy qańtar-sáýirde shıki munaıǵa mólsherlemeniń 42%-ke ulǵaıýyna jáne AQSh dollaryna shaqqanda teńge baǵamynyń ózgerýine baılanysty boldy. Oıyn bıznesine salynatyn salyq boıynsha jospar salyqtyq tekserý aktileri boıynsha bereshekti óteý esebinen asyra oryndaldy.
«Degenmen, ishki tutyný taýarlaryna salynatyn qosylǵan qun salyǵy boıynsha jospar oryndalmady. Sondaı-aq, jergilikti bıýdjetterdiń kiristeri 127,1%-ke atqarylyp, 1 trln 719 mlrd teńgeni quraǵan. Kirister boıynsha josparlar Mańǵystaý oblysyn qospaǵanda, barlyq óńirlerde asyra oryndalǵan», dedi Qarjy mınıstri.
Aıana Toǵanbek
