Buǵan deıin «Egemen Qazaqstan» gazetiniń Ońtústik Qazaqstan oblysyndaǵy menshikti tilshisi bolyp kelgen Oralhan Dáýit basylymnyń Jambyl oblysyndaǵy tilshisi qyzmetine taǵaıyndaldy. Tómende biz jumysyna kirisken áriptesimizdiń osy óńirden jazǵan alǵashqy maqalasyn berip otyrmyz.
«Segiz ulym bir tóbe, Er Tóstigim bir tóbe» demekshi, jambyldyqtar úshin «Qazfosfat» óz aldyna bir tóbe ekeni anyq. Áıteýir, fosforly Jambyldyń jaǵdaıynyń jaqsarýyna osy alyp kásiporyn úlken dem berýde. Endi, mine, sońǵy jyldary «Qazfosfat» JShS shetelmen qarym-qatynas jasaýdy jaqsy ıgerip alypty. Oǵan, árıne, Keden odaǵynyń tıgizip otyrǵan yqpaly mol.
Qazir «Qazfosfat» JShS álemniń 30-ǵa tarta eline óz ónimin saýdalap otyr. Elimizdegi hımııa ónerkásibiniń alyby sanalatyn bul kásiporyn úsh el arasyndaǵy ekonomıkalyq yqpaldastyqtyń arqasynda taýar aınalymyn meılinshe ulǵaıtýǵa qol jetkizdi. Kedendegi kedergiler alynyp tastalǵandyqtan búginde bul eldermen alys-beris emin-erkin júrýde. Sonyń arqasynda ótken jyly zaýyt Reseıge quny 85 mln. AQSh dollaryn quraıtyn daıyn ónim jóneltken. Esesine kórshilerimizden 50 mln. dollardan astam qarjyǵa koks, amıak, soda, qural-jabdyqtar jáne qosalqy bólshekter satyp alypty. Búgingi tańda zaýyt óniminiń 93 paıyzy shet memleketterge eksporttalady. Ol ónimder negizinen tamaq, sellıýloza, qurylys materıaldary, turmystyq hımııa ónerkásibinde qoldanylǵandyqtan ótimdiligi óte jaqsy, úlken suranysqa ıe.
– Sońǵy eki jylda Reseı men Belarýske quny 143 mln. dollardan astam ónim jónelttik. Al bıylǵy eki aıdyń ishinde 7 mln. dollardan astam ónim ótkizdik – deıdi bul jóninde zaýyttyń bas ınjeneri Absamat Kerimbaev.
Ozyq tehnologııanyń arqasynda zaýyt óniminiń sapasy edáýir jaqsarǵan. Eń bastysy, kásiporynnyń álemdik naryqtaǵy básekelestik qabileti artty. Jańa tehnologııa endirilgen sary fosfordy túpkilikti óńdeý sehy aıyna myń tonnadan astam daıyn ónim shyǵyp jatyr. Bir aıta keterligi, mundaı jańashyldyqty zaýyttyń ınjenerlik toby ózderi oılap taýypty. Osydan-aq, kásiporyn mamandary úlken izdenistiń ústinde ekenin baıqaýǵa bolady. О́nim sapasyn arttyrý baǵytyndaǵy izdenis áli de jalǵasyp jatyr.
Kásiporyn byltyr jylyna 600 myń tonnaǵa deıin kúkirt qyshqylyn shyǵaratyn sehty da iske qosty. Mıneraldy tyńaıtqyshtar quramynyń úshten birin quraıtyn bul ónim buǵan deıin ózge jaqtan qymbatqa satyp alynatyn edi. Shıkizat qazir zaýytqa eki esedeı arzanǵa túsip otyr. Bul daıyn ónimniń ózindik qunyn aıtarlyqtaı azaıtýǵa múmkindik beretini anyq. «Qazfosfat» osyndaı qarym-qatynastyń arqasynda qanatyn keńge jaıýda.
Oralhan DÁÝIT,
«Egemen Qazaqstan».
Jambyl oblysy.
–––––––––––––––
Sýretterdi túsirgen
Aǵadil RYSMAHAN.
