Altaıdaǵy alaman

Mereke kúni atshabardyń mańyna aqshańqan kıiz úıler tigilip, qazan kóterildi. Burq-sarq samaýyr qaınady. «Toı dese, qý bas domalaıdy» degendeı, tańmen talasa turǵan aýdan jurty ıppodromǵa aǵyldy. Bul ýaqytta kórshiles Altaı aýdanynan shyqqan shabandozdar Ertisti jaǵalaı shapqan. Máre syzyǵyna deıin 100 shaqyrym. Ertis­ten soqqan tańǵy samal sáıgúlikter­diń ókpesin asha tústi me, baýyr jaza kósildi. 100 shaqyrymǵa shydas bermeı, joldan shyqqan qylquıryqtylar da boldy. Shań qaptyra toptasa shap­qandardy da kórdik. Máreni birinshi qıyp ótkeni­ne sý jańa avtokólik tigilgen. Be­sin­shi kelgenge de júlde qomaqty. Son­dyqtan da, aýdan ákiminiń júldesine sha­bandozdar baryn saldy. Qatarlasa júrgen bapkerleri «qamshy bas» desip, qıqý qosty. Qalaı degenmen, baǵy men baby kelisken sáıgúlikter kómbege taıaǵan saıyn shabysqa shabys qosty. Tuıaq dúbiri estile sala, dúıim jurt shýlasty. Áne-mine degenshe, jıren qasqa qara úzip márege birinshi bolyp ilindi. Samarlyqtar bórikterin aspanǵa atty. Kúni keshe Prezıdent Jarlyǵymen qaı­­ta qurylyp jatqan Samar aýdany­nyń abyroıyn asqaqtatqan at – Rýslan Shaıyrǵazın esimdi azamattyń tulpary edi. Yrymshyl halyq muny jaqsylyqqa balady.

Budan keıin taı jarys, jorǵa, ushqyr báıge merekeniń kórigin qyzdyrdy. At dese, alaman dese, delebesi qozbaıtyn qazaq, qazaq pa?! Kópten beri kóńildi is-sharada basy qosylmaǵan el máz-máıram, arqa-jarqa.

Balýandardyń beldesýi de tartysty ótti. Jaýyryny jerge tımegen Azat Smaǵulov túıe balýan atansa, Rahat Narımanov ekinshi oryn aldy. Úshinshi oryndy Serikbol Qabdıev qanaǵat tutty. Báıgeden soń taqymy myqty, bilegi qarýly jigitter aýdaryspaqqa shyqty. Qarsylasyn at-matymen julyp alǵan bilektilerdi de kórdik.

Jarys sońynda aýdan ákimi Dildar Qalıqan júldegerlerge syı-sııa­pat­taryn tabystap, halyqqa jyly lebi­zin bildirdi, sharany uıymdastyrýǵa úles qosqan azamattarǵa alǵys aıtty, jarysqa qatysqan atsúıer aǵaıynǵa sáttilik tiledi. Aıta keterligi, kúzge sa­lym Katonqaraǵaıda respýblıkalyq dástúrli taı jarysy ótedi.     

Shyǵys Qazaqstan oblysy,

Katonqaraǵaı aýdany