Alıans prezıdenti Baný Nurǵazıeva beınekópir jumysyn ashyp, Qazaqstannyń júıeli transformasııasyna yqpal etetin jáne memlekettiń uzaq merzimdi damýynyń jańa paradıgmasyn aıqyndaıtyn Prezıdent Joldaýynda belgilengen saıası reformalardyń 10 basym baǵytyna jan-jaqty toqtaldy.
«Konstıtýsııalyq reformanyń saıası máni – sýperprezıdenttikten prezıdenttik basqarý nysanyna kóshý maqsatynda Ekinshi respýblıkaǵa ótý. Bul Qazaqstannyń bılik ınstıtýttaryn qalyptastyrý men ózara is-qımylynyń sapaly jańa modeline kóshýin, jańa saıası mádenıettiń ornyǵýyn bildiredi», dedi B.Nurǵazıeva.
Is-shara barysynda respýblıkalyq shtabtyń basshysy Tóleýbek Muqashev, «Qazaqstan depýtattary birlestigi» RQB tóraǵasy Maqsathan Anapın, Qazaqstannyń Azamattyq Alıansynyń 17 óńirdegi kóshbasshylary, jergilikti úkimettik emes uıymdardyń jetekshileri referendýmdy ótkizýdiń mánine tolyqqandy toqtaldy.
«Bul jerdegi basty másele – usynylǵan ózgerister boıynsha túsindirý jumystaryn durys júrgizý, sondaı-aq qoǵamnyń barlyq toptaryn talqylaýǵa tıimdi tartý. Munyń bári Memleket basshysy erekshe nazar aýdaratyn «Halyq únine qulaq asatyn memleket» tujyrymdamasyna sáıkes keledi», dedi Tóleýbek Muqashev saıası naýqannyń mánisine tereń úńilip.
Basqosýǵa qatysqan sarapshylar konstıtýsııalyq reformalar ýaqyt talabyna sáıkes keletinin, memleketti demokratııalandyrý baǵytyndaǵy oń úrdiske toly ekenin atap ótti. «Halyq reformalardyń mánin túsinýi jáne óz tańdaýynda belsendi bolýy úshin túsindirý jumystarynda judyryqtaı jumylýymyz kerek», dedi «GrIn» Qostanaı oblysynyń Azamattyq Alıansy qoǵamdyq qory tóraǵasynyń orynbasary Bolat Qalıev.
Búkilhalyqtyq referendýmnyń mańyzy jan-jaqty saralanǵan jıynda spıkerler adam quqyqtary jónindegi ýákildiń táýelsiz mártebesi, konstıtýsııalyq sotty zańdylyqty qamtamasyz etýdiń joǵary táýelsiz organy retinde qurý, sýperprezıdenttik basqarý formasynan prezıdenttik respýblıkaǵa kóshý sekildi taqyryptarǵa da keńinen toqtaldy.
