«Kólikti mas kúıinde basqarǵany úshin 500-den astam júrgizýshi ustaldy. Baǵdarshamnyń tyıym salatyn belgisine ótkeni úshin 1200-ge jýyq júrgizýshi jaýapkershilikke tartyldy. 1500-den astam avtokólik aıyppul turaǵyna qoıyldy», delingen baspasóz qyzmetiniń málimdemesinde.
Sondaı-aq, apattylyq jaǵdaı týǵyzǵany úshin 600 júrgizýshige ákimshilik shara qoldanylǵan. 7 myńnan astam jaıaý júrginshi ákimshilik jaýapkershilikke tartyldy.
«Polıseıler múddeli memlekettik organdarmen jáne úkimettik emes uıymdarmen birlesip, turaqty negizde túrli profılaktıkalyq is-sharalar ótkizedi. Jyl basynan beri «Jarqyn bol» jáne «Nazar aýdaryńyz, balalar» aksııalary, «Balalardyń joldaǵy qaýipsizdigi» jedel-aldyn alý is-sharasy uıymdastyryldy. Mektep jáne mektepke deıingi uıymdarda jol qozǵalysy erejelerin saqtaý týraly 3000-ǵa jýyq dárister, vıktorınalar jáne áńgimelesý-túsindirý jumystary júrgizildi», dep habarlaıdy PD baspasóz qyzmeti.
Sonymen qatar, jas ınspektorlar jasaqtarynyń qatysýymen júrgizýshilerge jadnamalar men balalardyń sýretterin taratý boıynsha 65 aksııa uıymdastyryldy. 3500 danadan astam taralymmen úgit nasıhattyń 20 túri shyǵaryldy.
«Qabyldanyp jatqan sharalarǵa qaramastan, bıyl elorda aýmaǵynda jol-kólik oqıǵalarynan 30-ǵa jýyq kámeletke tolmaǵan bala zardap shegip, bir bala kóz jumdy», dep atalyp ótken málimdemede.
Nur-Sultan qalasynyń polısııa departamenti júrgizýshilerge jol qozǵalysy erejelerin múltiksiz saqtaýdy eskertedi. Mektepter men balabaqshalarǵa jaqyn jerlerde, rettelmeıtin jaıaý júrginshiler ótkelderinde, qoǵamdyq kólik aıaldamalary tusynda, ásirese aýlalarda óte muqııat bolýdy eske salady.
