Erwinia amylovora – jemis aǵashtarynda bakterııalyq kúıdirgini týdyratyn erekshe qaýipti qozdyrǵysh. Bakterııa ásirese alma men almurt aǵashtary úshin qaýipti jáne bar bolǵany eki maýsymnyń ishinde baqshany jappaı búldirýi múmkin. Búginde bakterııalyq kúıiktiń taralyp ketken túrlerine tıimdi em joq, tek erte dıagnostıkalaý arqyly ǵana onyń aldyn alýǵa bolady. Al endi ázirlengen LAMP dıagnostıkalyq júıesi jemis aǵashtaryn saqtaýǵa kómektesedi.
Bilim jáne ǵylym mınıstrligine qarasty M.Aıthojın atyndaǵy Molekýlalyq bıologııa jáne bıohımııa ınstıtýtynyń bıologi Nurbol Ǵalıaqparov: «Biz ázirlegen LAMP negizindegi bakterııalardy anyqtaýdyń jańa júıesi qazirgi kezde qoldanylatyn klassıkalyq PTR-men salystyrǵanda 100-1000 ese sezimtal. Sezimtaldyqtan basqa, PTR-den aıyrmashylyǵy – LAMP tehnologııasy qoldanýǵa yńǵaıly, dala jaǵdaılaryna ońaı beıimdeledi, sonymen qatar qymbat reagentter men jabdyqtardy qajet etpeıdi. Salystyrmaly túrde bakterııalyq kúıikti anyqtaýǵa arnalǵan bizdiń test-júıemizdiń bir synama quny 6 myń teńge, aǵylshyn zerthanasynda 31 myń teńge, shveısarııalyq zerthanada 57 myń teńge turady. Osy arzan test-júıelerdiń kómegimen ár baǵban erte dıagnostıkaǵa qol jetkize alady. Eger úı baqshalary ózdiginen qalyp qoısa, onda olar jabaıy alma aǵashtaryna juqtyrý qaýpi bar. Al elimizde jabaıy alma aǵashtarynyń nátıjesinde dúnıejúzilik mura sanalatyn Sıvers alma aǵashy ósedi, ony saqtaý kerek», deıdi.
Qazirgi ýaqytta M.Aıthojın Molekýlalyq bıologııa jáne bıohımııa ınstıtýtynyń ǵalymdary jabaıy alma aǵashtarynda Erwinia amylovora bakterııasyn anyqtaý boıynsha jumys júrgizip, bakterııalyq kúıiktiń taralýyn boldyrmaý, onyń ishinde jańa test-júıelerdi paıdalaný úshin praktıkalyq usynystar ázirlep jatyr.
