Máselen, memlekettik qyzmetshiler men bıýdjettik mekeme qyzmetkerleri alatyn páterdi ózge sanattaǵy jastardyń alýy qıyn edi. Jýyrda Jambyl oblysynda óńir jastary úshin biregeı baǵdarlama iske qosyldy. «Áýlıeata jastary» óńirlik baǵdarlamasy qolǵa alynyp, júzdegen jastyń baspana máselesin sheshý josparlanýda. Atalǵan baǵdarlama aıasynda endi aımaqtaǵy jastarǵa jeńildetilgen baspana nesıesi berile bastaıdy. Osy oraıda, basqa ıpotekalyq baǵdarlamalarda qamtylǵan sanattarǵa jatpaıtyn, biraq tólem qabileti bar jastarǵa basymdyq berilip otyrǵanyn aıta ketken jón. Qazirgi tańda túsindirý jumystary bastalyp ta ketti.
Qazirgi kezde qalada turaqtap qalǵan jas kóp. Biraq báriniń birdeı baspana alýǵa shamasy jete bermeıdi. Jambyldyq jastardyń páter aýyrtpalyǵyn tartyp júrgenderi de az emes. Osy oraıda, óńirge jastardy meılinshe qoldaıtyn, olardyń baspanaly bolýyna jaǵdaı jasaıtyn bir múmkindik kerek-aq edi. Sol olqylyqtyń orny endi tolyp otyr. Oblystyq jastar saıasaty máseleleri basqarmasynyń basshysy Serikbol Berikqojanyń aıtýynsha, «Áýlıeata jastary» oblysta memlekettik jastar saıasatyn damytýdyń 2021-2025 jyldarǵa arnalǵan baǵdarlamasy. Keshendi jospardy iske asyrýǵa 5 jylǵa 1,3 mıllıard teńge qarastyrylǵan. Joba oblys ákimdigi tarapynan da qoldaý tapqan. Biraq bul maqsatqa tıisti qarajat qarastyrylǵanmen, aımaqtaǵy keıbir atqaminerler atalǵan máselede salǵyrttyq tanytyp otyr eken. «О́tken jyly baǵdarlamanyń tıimdi iske asyrylýyn baqylaý maqsatynda zerdeleý jumystary júrgizildi. Mundaǵy 94 tarmaqtyń 80-i oryndalsa, qalǵany uzaq merzimge josparlanǵan. Zerdeleý nátıjesinde Taraz qalasy men aýdandarda birneshe kemshilik anyqtaldy. Atalǵan ákimdikterdegi salalyq bólimder bul tapsyrmanyń merziminde oryndalýyna basa nazar aýdarmaǵan jáne tanyspaǵan», deıdi Serikbol Berikqoja. Sondaı-aq basqarma basshysy Sarysý, Jambyl, Jýaly, T.Rysqulov jáne Moıynqum aýdandarynyń ákimderi baǵdarlamanyń aýdan kóleminde iske asyrylýyn baqylaýǵa alý qajet ekenin aıtty. Bul rette aýdan jastarynyń da baspanaly bolýyna múmkindik mol.
«Áýlıeata jastary» baǵdarlamasy búgingi tańda Memleket qoldaýynyń nátıjesinde Jambyl óńirinde júzege asyp otyrǵan jańa joba. Baǵdarlama sheńberinde jergilikti jastarǵa jeńildikpen nesıe berý qarastyrylýda. Bul joba bıylǵy jyldyń shilde aıynda iske asa bastaıdy dep josparlanýda. Joba óńir jastaryn qoljetimdi turǵyn úımen qamtamasyz etýge jáne jas otbasylardy qoldaý maqsatynda daıyndalǵan. «Baǵdarlamany ázirleýde oblystyń erekshelikterin eskere otyryp jáne Nur-Sultan men Almaty qalalarynda oń nátıje bergen pılottyq baǵdarlamalar negizge alyndy. Buǵan deıin oblysta jastar men jas otbasylardy turǵyn úımen qamtamasyz etýge baǵyttalǵan arnaıy baǵdarlama bolmaǵan», deıdi Serikbol Berikqoja. Munda túrli jeńildikter de qarastyrylǵan. Atalǵan joba aıasynda páter alýǵa nıettengen árbir jas 19 jyl merzimge 13 mıllıon teńgege deıin ala alady. Árbir páter alýǵa nıetti jas bes paıyzdyq jeńildikpen baspana alýyna bolady.
Baspana alý jastar úshin basty másele. Búginde oblys boıynsha turǵyn úı alýǵa 7 140 jas, al jer telimin alýǵa 10 787 jas kezekte tur eken. О́tken jyly 318 jas qana ıpotekalyq nesıe rásimdegen. Al búgingi «Áýlıeata jastary» jobasy jambyldyq jastarǵa qoldaý kórsetýde. Kerisinshe, bul jobaǵa kezekte turǵan memlekettik jáne bıýdjettik qyzmetkerler qatysa almaıdy. Jambyldyq jastarǵa úmit syılap otyrǵan bul jarqyn joba memlekettiń taǵy bir mańyzdy múmkindigi ekeni anyq.
Jambyl oblysy
