«Eldegi qylmystyq jaǵdaıǵa toqtalsaq, bir apta ishinde 3116 qylmys jasaldy, onyń 1892-si táýlik ishinde ashyldy», dedi Sh. Turlybek.
Osy oraıda ol polısııa qyzmetkerleri «izin sýytpaı» eki kisi óltirý, alty ólimge ákep soqqan densaýlyqqa qasaqana aýyr zııan keltirý, bir qaraqshylyq, 45 tonaý jáne 507 bótenniń múlkin urlaý qylmystaryn ashqanyn atap ótti.
Budan bólek Sh. Turlybek ótken aptada Ishki ister mınıstri Marat Ahmetjanov Pavlodarda óńir turǵyndarymen kezdeskenin aıtty.
«Elordadan mınıstrmen birge IIM qoǵamdyq keńesiniń músheleri men vedomstvonyń ortalyq apparatynyń basshylary keldi. Sonymen qatar qalalyq mádenıet saraıynda Marat Ahmetjanov aımaq turǵyndary aldynda esep berdi. Birinshi kezekte mınıstr vedomstvo reformalaryna, eldegi jáne óńirdegi qylmystyq jaǵdaıǵa toqtaldy. Ol jalpy qylmys deńgeıiniń tómendeý úrdisi baıqalǵanyn aıtty. Vedomstvo basshysy turǵyndardyń barlyq suraqtaryna jaýap berdi. Pavlodarlyqtardy negizinen qylmystyq isterdi tergeýdiń sapasy men merzimderi, jol qaýipsizdigi, ákimshilik zańnama, ınternet-alaıaqtyq, otbasylyq-turmystyq qatynastar jáne basqa da máseleler qyzyqtyrdy», dedi mınıstrlik ókili.
Aıana Toǵanbek
