Almaty qalalyq sotynyń baspasóz qyzmeti habarlaǵandaı, qańtar aıynyń 6-synan 7-sine qaraǵan túni Qaraǵandynyń 23 jastaǵy turǵyny Maxima oıyn-saýyq kesheniniń janynan ótip bara jatyp, terezelerdiń synǵanyn baıqaǵan.
«Sottalýshy keshenniń ishine kirip, ekinshi qabattaǵy Prato dúkeninen quny 33 333 teńgelik Iphone-6 markaly uıaly telefonyn, keıin Monamie dúkeninen quny 30 351 teńge Dior ıis sýynyń eki qutysyn urlaǵan. Sot bul áreketterdi Qylmystyq kodekstiń 188-baby, 3-bóliginiń 2, 3-tarmaqtary boıynsha urlyq, ıaǵnı, qoımaǵa zańsyz kirý arqyly birneshe ret jasalǵan bótenniń múlkin jymqyrý dep tanydy. Sottalýshy óz kinásin moıyndap, basqa adamdardyń dúkenderden zat alyp jatqanyn kórgen soń ózi de kirip, taýarlardy urlaǵanyn aıtty. Al Qylmystyq kodekstiń 188-baby, 3-bóliginiń 2, 3-tarmaqtary boıynsha eki jyldan jeti jylǵa deıingi merzimge bas bostandyǵyn shekteýge, ne sol merzimge bas bostandyǵynan aıyrý jazasy qarastyrylǵan. Sot onyń jastyǵyn, kinásin moıyndaǵanyn, shyn nıetpen ókingenin jáne birinshi sottylyǵyn eskere otyryp, mınımaldy eki jyl merzimge bas bostandyǵyn shekteý jazasyn taǵaıyndady», delinedi qalalyq sottyń habarlamasynda.
Úkim zańdy kúshine engen joq.
