Oblystyq polısııa departamentiniń bastyǵy, polısııa polkovnıgi Nurhat Orazbaevtyń aıtýynsha, tártip saqshylary 1 sáýirden beri 1 tonna balyq tárkilep úlgergen. Onyń ishinde 500 keliden astam bekire bar.
«1 sáýirde Jaıyq-Kaspıı basseıniniń sý aıdyndarynda «Bekire – 2022» keń aýqymdy balyq qorǵaý is-sharasy bastaldy. Atalǵan is-shara quqyq, tabıǵat qorǵaý organdarymen birge joıylyp ketý qaýpi bar baǵaly bekire tuqymdas balyq túrleri men balyq ónimderiniń zańsyz aınalymyn anyqtaý, aldyn alý jáne jolyn kesý úshin ótkizilip jatyr. Is-sharaǵa baılanysty «Atyraý-Reseı Federasııasynyń shekarasy», «Atyraý-Aqtóbe», «Atyraý-Oral» jáne «Atyraý-Inder» baǵytyndaǵy respýblıkalyq, oblystyq mańyzy bar joldarda, Kaspıı teńiziniń, Jaıyq, Qıǵash ózenderiniń jaǵalaýynda 39 jyljymaly mobıldik top qyzmet etýde. Zańsyz balyq aýlaýdyń jolyn kesý úshin Jaıyq ózeni jaǵalaýyna 19 beınebaqylaý kamerasymen baqylaý júrgizilip otyr. Brakonerlerge qatysty 18 qylmystyq is qozǵaldy. Onyń ishinde 2 is QR Qylmystyq kodeksiniń 335-babymen (Balyq resýrstaryn zańsyz aýlaýmen), al, 16 is 339-babymen (Janýarlardyń sırek kezdesetin túrlerimen zańsyz aınalysý) tergelip jatyr», dep túsindirdi Nurhat Orazbaev.
Onyń aıtýynsha, tártip saqshylary 28 sáýirde 36 jastaǵy áıeldiń turǵylyqty meken-jaıyna tintý júrgizip, 15,8 keli bekire tuqymdas, 5 keli qara balyq tárkilegen.
Qazirgi ýaqytta atalǵan derekke qatysty Qylmystyq kodekstiń 339-babynyń 1-bóligimen sotqa deıingi tergep-tekserý jumystary bastaldy.
