Bank4Me (www.bank4.me) – ınternet arqyly bólip tóleýge nemese nesıe alýǵa múmkindik beretin onlaın-bankıng platformasy. Bul startap bankterdiń, rıteıler (bólshek saýdamen aınalysatyn zańdy jáne jeke tulǵalar) men klıentterdiń máselelerin sheshýge arnalǵan tehnologııalyq ónim.
«Biz jergilikti bankter men BNPL qyzmetterin (birden satyp alýǵa jáne belgili bir ýaqyt aralyǵynda teń úlestermen tóleýge múmkindik beretin servıs túri) usynatyndarǵa senimdi jáne qolaıly habqa aınaldyq. Osy arqyly olar bıýdjetterine qaraı klıentterdi tartyp, ózara tıimdi baılanys qura alady. Sondyqtan jobamyzdyń Ortalyq Azııada ǵana emes, sonymen birge qarqyndy damyp jatqan Ońtústik-Shyǵys Azııa men Soltústik Afrıkanyń naryqtaryna tabysty shyǵa alatynyna kózimiz jetip otyr», dedi Bank4Me bas dırektory Andreı Antropov.
Kazakhstan Digital Acceleration Program baǵdarlamasy (KDA) aıasynda Bank4Me jobasy Ortalyq Azııada qarjylyq-tehnologııalyq startaptardy ınvestısııalaıtyn Quest Ventures venchýrlyq kompanııasynan 50 myń dollar kóleminde qarajat aldy.
«Bank4me – KDA baǵdarlamasy arqyly tehnologııalardy sátti transfertteýdiń tıimdi úlgisin kórsete bildi. Atalǵan startaptyń negizi Belarýs elinde qalanǵan edi. Dese de KDA baǵdarlamasynda tabysty kórsetkishterge qol jetkizip, alǵashqy ınvestısııalardy alýdyń nátıjesinde jobanyń ıeleri kompanııany AHQO-da tirkeý týraly sheshimdi qabyldady. KDA túlekteriniń órkendep, damýdyń kelesi kezeńine ótip jatqanyna jáne VentureRocket Eurasia platformasynda qarajat jınaý naýqanyn bastaǵanyna qýanamyz. Bul Ortalyq Azııadaǵy startap ekojúıesine jaqsy belgi», dedi Quest Ventures-tiń ınvestısııalyq dırektory Rýslan Raqymbaı.
Bank4Me jobasynyń bul qadamy VentureRocket Eurasia platformasyndaǵy alǵashqy ınvestısııalyq aınalym sanalady.
«VentureRocket Eurasia platformasynda birlesken qaýipsiz ınvestısııalarǵa qolaıly jaǵdaı jasaý arqyly óńirge kóbirek ınvestısııa tartýǵa septigin tıgizemiz. Platforma 2021 jyly iske qosylǵannan beri 100-den astam startapty baıqap, shamamen 60%-yn VentureRocket Eurasia-da tirkedik. Platformamyz Ortalyq Azııadaǵy venchýrlyq kapıtal naryǵyn damytýdyń tıimdi quraly sanalady jáne aımaqtyq startaptardyń ekojúıesiniń ulǵaıýyna úles qosady dep senemiz», dedi VentureRocket Eurasia bas dırektory Arslan Qudııar.
Qarajat jınaý naýqany osy jyldyń sońyna deıin jalǵasady. Investısııalardyń aǵymdaǵy aınalymy (500 myń dollarǵa deıin) Ońtústik-Shyǵys Azııa naryǵyn belsendi ıgerýge baǵyttalady.
