Úsh ánniń tusaýy kesildi

Halqymyz talantqa da, talaptyǵa da kende bolyp kórgen joq. Búginde bir-birinen asyp jarqyraýshy óner sańlaqtary sonyń aıǵaǵy bolsa, birazy qaraǵandylyqtarǵa da jaqsy tanymal. Ortalarynan jıi tabylatyndary bar, óneri syrttaı baýrap, sahnadan júzbe-júz júzdesýge tilenetinderi bar. Sondaıǵy jankúıer júırik biriniń ádemi ánderin kózbe-kóz tyńdap, qulaq terbetip, kóńil hoshyn kóterýge degen ańsaýshylyq bolar, Kenshiler mádenıet saraıyna kelýshiler shoǵyrly bolǵan edi. Iá, belgili sazger Jalǵas Keńesovtyń «Bolashaqqa qaraımyn nurly kózben» atty shyǵarmashylyq keshi kútilse kútilgendeı, jú­rekke qonsa qonǵandaı bolyp, tyńdaýshylar kókirek kórigin marhabattandyryp, shýaǵyna shalqytty. Saýsaq búgip sanarlyqtaı emes, júzden astam ánniń shyǵarýshysy ári oryndaý­shy retinde de qos talant qonǵan jigit óner qyryn tanytýshylardyń dóıi áıgili Nurǵalı Núsipjanov syndy sańlaqtyń ózi bolýy jurtty tipti súısindirdi. Kesh ashylýynda «Búgingi konserttik kezdesý sizderdiń aldaryńyzdaǵy shyǵarmashylyq esebim sııaqty. Saryarqa tóri – Qaraǵandy topyraǵynyń ónersúıer qaýymymen qaýy­shýdyń alǵash ret sáti túsýine oraı, arnaıy tartýmen keldim. Aqyndar Serikzat Dúısen­ǵazynyń, Temir Myńjastyń, Turǵanbek Kaneevtiń óleńderine shyǵarǵan «Astana», «Apa, sen qartaımaısyń», «Sulýym» atty ánderimniń tusaýy kesiledi qazir» degen ol kesh jalǵasyn kúmis kómeı Dosymjan Tańatarov, Gúlzıra Bókeıhan, Gúldáýren Jıdebaevaǵa berýinen keıin-aq shyǵarmashylyq shyraıy jaıyldy. – Jalǵas Keńesovtyń ánderin otbasymyzben súısine tyńdaımyz. Myna kesh úlken áserge bóledi», – degen Qara­ǵandy medısınalyq kolledjiniń dırektory Amanjol Nurbekov oıy tyńdaýshylardyń ortaq kóńil sezimin bildirdi. Aıqyn NESIPBAI, «Egemen Qazaqstan». QARAǴANDY.