Sý basý qaýpi seıilgen joq

Qyzyljar óńirinde sý basý qaýpi sanalatyn aýdandardyń biri – Ýálıhanov. Bıyl da kórshiles Aqmola oblysyna qarasty Sileti sý qoımasynan tirshilik náriniń kóp bosatylýyna baılanysty sý deńgeıi kúrt kóterilip, Qaratal jáne Qýlykól aýyldaryn baılanystyratyn avtókólik jolyn sý shaıyp ketti. Tótenshe jaǵdaılar departamenti, sýda qutqarý qyzmeti jáne jergilikti bılik oryndary judyryqtaı jumyla otyryp, apattyń aldyn alý sharalaryn uıymdastyrdy. Qaratal aýylynyń eki júzge jýyq turǵyndary Qýlykól aýylyna kóshirildi. Bul maqsat úshin birneshe motorly qaıyq paıdalanyldy. Úzilgen joldy qalpyna keltirý úshin ınertti materıaldar tóseý jumystary dereý qolǵa alynyp, ondaǵan tehnıka birligi jumyldyryldy. Sý basý qaýpi seıilgen soń qarataldyqtar eki kúnnen keıin aýyldaryna keldi. Qýlykól eldi mekeniniń shetki kóshelerinen ortalyqqa qonys aýdarǵan 226 turǵyn da oraldy. Esil ózeni boıynda ornalasqan Sergeev sý qoımasynyń jobalyq syıymdylyǵy 693 mıllıon tekshe metrge shaqtalsa, kún ótken saıyn sý deńgeıi kóterilip keledi. Búginde onyń mólsheri 142 santımetrge jetti. О́zen qoınaýlaryndaǵy sý kóleminiń de molaıa túskeni baıqalady. Gıdobeketterdiń málimetterine qaraǵanda, Pokrovka, Novonıkolskoe eldi mekenderi men Petropavl qalasy mańynda orasan sý mólsheri jınalǵan. Aıtyp kelmes apat bastalǵannan beri oblys boıynsha turǵyn úılerdi sý shaıýdyń 106 faktisi tirkelgen. Der kezinde qoldanylǵan sharalardyń nátıjesinde eshkim zardap shekken joq. Tasqyn sýdy boldyrmaý, aldyn alý jaıy ákimdikte birneshe ret qaralyp, aımaq basshysy Samat Eskendirovtiń erekshe baqylaýynda tur. О́mir ESQALI, «Egemen Qazaqstan». Soltústik Qazaqstan oblysy.