«Adamnyń kúni adammen» degendeı, tirshilikte kómekke muqtaj jandar kóp. Saýapty iske ortaqtasqysy kelgen Almatydaǵy Qazaq memlekettik qyzdar pedagogıkalyq ýnıversıtetiniń «Jan jylýy» eriktiler klýby «Jan jylýy – ómir shýaǵy» atty kezekti qaıyrymdylyq konsertin ótkizip, Bekbolat esimdi búldirshinge qol ushtaryn berdi.
Atalmysh klýbtyń 3 jyl tolýyna oraılastyrylǵan qaıyrymdylyq shara ókpesi jetilmeı qalǵan Bekbolat esimdi 1 jastaǵy búldirshinge arnaldy. Klýb músheleri «Qazirgi tańda memleket balanyń em-domyna kvota bólgen, biraq, jol shyǵyny, shet elde páter jaldap turý máselesi otbasyna qıyndyq týǵyzyp otyr», – degen aqparatty «Qazaqstan» ulttyq telearnasynyń «Jan jylýy» baǵdarlamasynan estigen. Sodan keıin ile-shala bul otbasyǵa qoldaý bildirý maqsatynda atalmysh qaıyrymdylyq aksııasyn uıymdastyrýdy sheship, bir otbasynyń basyna túsken qaıǵy-qasiretti qoldan kelgenshe jeńildetýge tyrysty. Sharaǵa Bekbolat pen onyń anasy arnaıy shaqyryldy.
Jastardy jomarttyqqa baýlý, taǵdyr tálkegine ushyraǵan jandarǵa qoldaý kórsetý maqsatynda ótken sharaǵa «Tek qana, qyzdar» KVN komandasy, «Almaty jaıdarmany», «О́ner qyrandary», «Melomen», «Qyran» toby, «Tomırıs» bı ansambli, Merýert Túsipbaeva, Gúlnar Álimbekova, Tańat Mamyrhan, Qanat Úmbetov, Janar Dáýkeeva, Bóribek Rasýlov, Raıym Ýaıys, Beıbit Qushqalıev syndy estrada juldyzdary qatysyp, aksııany qoldady.
Kesh barysynda oqý ornynyń Áleýmettik jáne tárbıe isteri jónindegi prorektory Záýresh Sabyrova qashan da qaıyrymdylyqtan kende bolmaǵan ulttyq bolmysymyz jaıly stýdenttermen syr bólisip:
– Qaıyrymdy adamdardyń ómir joly tek izgilikten, meıirimdilikten turady. Atamyz qazaq «Qoly ashyqtyń – joly ashyq» dep beker aıtpaǵan. Igi shara jastardyń boıynda qaıyrymdylyq sezimin uıalatyp qana qoımaı, óskeleń urpaqty rýhanı jaǵynan tárbıeleýge de zor septigin tıgizedi, – dep sharadan túsken 400 myńǵa jýyq qarajatty Bekbolattyń anasyna tabystady.
Ýnıversıtet basshylary sharaǵa atsalysqan ánshilerge alǵysyn bildirip, sábıdiń saýyǵyp ketýin, stýdentterdiń tamshydaı ǵana úlesiniń sharapaty tıe berýin tiledi. Al stýdentter izgi tilekterin ásemhattarǵa jazyp berdi. Estrada juldyzdary da júrekjardy tilekterin bildirdi.
Aksııa aıasynda «Jan jylýy» eriktiler klýbynyń músheleri arnaıy jármeńke de uıymdastyryp, budan túsken qarajat ta Bekbolattyń esep-shotyna aýdaryldy.
Aınash ESALI,
«Egemen Qazaqstan».
ALMATY.
