AQSh-ta musylmandardy baqylaý toqtatylady

Nıý-Iorktaǵy polısııa basqarmasy eldegi musylman qaýymyn ańdýmen aınalysqan arnaıy bólimshesin taratý jóninde sheshim qabyldady. Bul týraly ITAR-TASS habarlady. 2011 jyldyń jazynda Associated Press agenttigi júrgizgen jýrnalıstik zertteý nátıjesinde Nıý-Iork polısııasynyń 2003 jyldan beri musylmandardy baqylaý maqsatynda keń kólemde jumys atqaryp kelgeni belgili boldy. Ortalyq barlaý qyzmetiniń kómegimen olar eldegi musylmandardyń kúndelikti tirshiligin túgel baqylap otyratyn baǵdarlama jasap shyqqan eken. Tártip saqshylary musylmandardyń qaı jerde tamaqtanatyndary, baratyn dúkenderi, qaıda jumys istep, qaıda qulshylyq etetinderi jóninde derekter jınaǵan. Nıý-Iork polısııasynyń bul áreketteri kóptegen quqyq qorǵaý qurylymdary tarapynan úlken synǵa ushyrady. Sol kezde burynǵy mer Maıkl Blýmberg basqarǵan qala bıligi musylmandardy ańdý áreketi júrip jatqanyn moıyndap, alaıda, bul istiń zańǵa qaıshy kelmeıtinin alǵa tartqan bolatyn. Sondaı-aq olar musylmandardy ańdý arqyly el aýmaǵynda birneshe teraktiniń aldyn alýǵa múmkindik týǵanyn jetkizdi. Nıý-Iork qalasynyń qazirgi meri Bıll de Blazıo saılaý aldyndaǵy naýqanda atalmysh baǵdarlamany toqtatýǵa sóz bergen-tin. Aıdar О́risbaev. Derekkóz: Itar-tass.com. Foto: AP Photo.