Otandyq kásipkerlerge qyryn qaraıtyn sheneýnikterge oryn bolmaýy tıis

Qazaqstan Respýblıkasy Prezıdenti janyndaǵy Ortalyq kommýnıkasııalar qyzmetinde arnaıy brıfıng ótkizgen Ulttyq kásipkerler palatasynyń basqarma tóraǵasy Abylaı Myrzahmetov «EKSPO-2017» halyqaralyq kórmesinde elimizdiń kásipkerleri belsendilik tanytýy tıis dedi. Bul týraly «Ekspress K» habarlady. Atalǵan brıfıngte elimizdegi damý ınstıtýttarynyń qyzmeti birshama synǵa alyndy. Abylaı Myrzahmetov: «О́kinishke qaraı, sońǵy 3-4 jylda damý ınstıtýttary kásipkerlikti damytý isinen qol úzgendeı, olar tek qoldaryndaǵy qarjyny bir jerden ekinshi jerge quıyp, sodan tapqan ósimniń arqasynda kún kórip otyr», – dedi. Brıfıngte aıtylǵandaı, kásipkerler álgi qurylymdardyń qyzmetine qoǵamdyq baqylaý ornatý kerek dep esepteıdi. Sondaı-aq, dırektorlar keńesiniń quramyna táýelsiz kásipkerlerdiń ókilin engizý kerektigi de sóz boldy. Abylaı Myrzahmetov jıyn barysynda Ulttyq kásipkerler palatasynyń josparynda memlekettik sheneýnikterdi kásipkerlerge qurmetpen qaraýdy úıretý isi de bar ekenin jetkizdi. Sondaı-aq, ol kásipkerlerge qyryn qaraǵan ákimshilik qyzmetkerlerin jumysynan bosattyryp jiberetin jaǵdaıǵa deıin jetýimiz kerek degendi de tiline tıek etti. – Jaýapkershilik júgi aýyr Úkimet qyzmetkerlerini túsinemiz... Úkimet basshysy kásipkerlerdi jınap, úılestirý keńesin ótkizip otyrady, al ákimdikterge kirip, ondaǵy ákimniń orynbasarlarymen sóılesýdiń ózi qıyn. Memleket basshysy kásipkerlikti damytý qajettigin kún tártibine shyǵaryp otyrǵan qazirgi tańda ondaılarǵa ákimdikten oryn bolmaýy tıis dep esepteımin, – dedi Abylaı Myrzahmetov. Sondaı-aq, Ulttyq kásipkerler palatasynyń basqarma tóraǵasy otandyq kásipkerlerdiń kemsitýshilikke ushyramaýy úshin kúsh salatynyn da aıtyp ótti. Jıyn sońynda Abylaı Myrzahmetov «EKSPO-2017» halyqaralyq kórmesinde kásipkerlerdiń belsendilik tanytatynyna ýáde berdi. Esterińizge sala keteıik, taıaýda Memleket basshysy «EKSPO-2017» kórmesin uıymdastyrýshylarǵa Ulttyq kásipkerler palatasymen birlesip arnaıy baǵdarlama túzýdi tapsyrǵan-dy. Bul baǵdarlamanyń maqsaty – kásipkerlerimizdi kórmeniń daıyndyq jumystaryna tartý bolmaq. Joldybaı Bazar. Derekkóz: «Ekspress K». Foto: ortcom.kz.