Jeńil júristi áıel qyzyn qylmyskerge baqtyryp, sábı japa shekken

Qostanaıda ózgeniń balasyn kútimine alyp, osy qyzmetiniń aqysyna kún kórip júrgen 35 jastaǵy áıeldiń ústinen qylmystyq is qozǵaldy. 1979 jyly týǵan kútýshi áıel óziniń qaraýyndaǵy sábıge jábir kórsetken dep aıyptalýda. Bul týraly Nur.kz portaly habarlady. Qostanaı qalalyq emhanasyna aýyr jaǵdaıda jetkizilgen sábıdiń saý-tamtyǵy qalmapty. Dárigerler balanyń dıstrofııanyń aýyr túrine ushyraǵanyn, ıaǵnı, aǵzaǵa azyq sińbeýinen salmaǵynyń kemip, densaýlyǵynyń kúr tómendep ketkenin aıtyp otyr. Bir bul ǵana emes, sábı ózin aınaldyrǵan birneshe derttiń qyspaǵynda qalǵan. Dáliregin aıtsaq, onyń tánin pnevmonııa, gepatıt, nefrıt, otıt, rahıt sekildi aýrý túrleri ábden meńdep alypty. Sonymen qatar, ortalyq nerv júıesi de buzylǵan. Qalyptasqan jaǵdaıdyń túp-tórkinin tekserý barysynda anyqtalǵandaı, balasyn baǵýǵa kútýshi jaldaǵan áıel de «saý sıyrdyń tezegi» bolmaı shyqty. Balanyń sheshesi esh jerde jumys istemeıtin, araq-sharaptan aýzy bosamaıtyn, tánin saýdaǵa salyp, nápaqa aıyrǵan jeńil júristi áıel eken. «Bala qalaısha osynsha jantúrshigerlik jaǵdaıǵa tap bolǵan?» degen suraqqa sheshesymaq: «Men ony kútýshi áıelge tapsyrǵanmyn» dep aqtalypty. Al kútýshi áıel de óz ýájin aıtqan. Ol balany qaraýyna alǵan kezde jaǵdaıy dál osyndaı tómen bolǵanyn, onyń ústine kútip-baqqany úshin sheshesi eshqandaı aqy tólemegenin alǵa tartypty. Kútýshi áıeldiń «túp-tamyryn» teksergende onyń aqtalyp, abyroı tabatyndaı jóni joq ekeni belgili boldy. Ol bala kútimi qyzmetine baılanysty birneshe ret jaýapqa tartylypty. Sonymen qatar, 2013 jyly bir sábı osy áıeldiń qolynan shetinepti. Qazir joǵaryda aıtylyp ótken iske qatysty tergeý amaldary júrgizilýde. Joldybaı Bazar. Derekkóz: Nur.kz. Foto: Bigmir.net.