Almaty qalasynda 35 jasqa deıingi jastardy turǵyn úımen qamtamasyz etý maqsatynda bıylǵy 18 mamyr men 1 maýsym aralyǵynda www.almaty-zhastary.kz saıty arqyly jeńildikter berýge ótinishter men «Almaty jastary» baǵdarlamasy boıynsha turǵyn úı nesıelerine qatysty qujattar qabyldanady. Ermek Ámirovtiń aıtýynsha, saıtta ótinishter men qujattardy qabyldaý elektrondy sıfrly qoltańba arqyly júzege asady. Avtomatty ball qoıý úshin elektrondy kalkýlıator engizilgen. Jeke kabınet arqyly ótinishtiń barysymen tanysýǵa bolady. Qujattardy qabyldaý 1 maýsymda saǵat 23:59-da aıaqtalyp, 20 jumys kúni ishinde baǵdarlama talaptaryna sáıkestigi tekseriledi. Odan keıin árbir sanat boıynsha jınalǵan eń joǵary upaı sanyna sáıkes tizim jasalady.
Baǵdarlamanyń bıýdjetine 18 mlrd teńge qarastyrylyp otyr. Al nesıeniń eń joǵary somasy – 18 mln teńgege deıin. Syıaqy mólsherlemesi – 5, bastapqy jarnasy – 10 paıyz. Qatysýshynyń jańa salynǵan nemese qoldanystaǵy turǵyn úı naryǵynan 45 kúntizbelik kún ishinde úı tańdaý múmkindigi bar. Baǵdarlamaǵa qamtylatyndar sany 1 myńǵa jýyq.
Negizgi talaptarǵa sáıkes, D.Túsipovanyń aıtýynsha, ótinish berýshiniń jáne otbasy músheleriniń menshik quqyǵynda sońǵy bes jyl ishinde turǵyn úıi bolmaýy shart. Sonymen birge qatysýshynyń qalanyń densaýlyq saqtaý, bilim berý, mádenıet, sport, joǵary oqý oryndary men ǵylymı-zertteý ınstıtýttary, jýrnalıster, áleýmettik sala jáne quqyq qorǵaý organdaryndaǵy resmı jumys ótili sońǵy alty aıdan kem bolmaýǵa tıis. Qalada keminde bir jyl merzimge tirkelgen jeke kásipkerler de ótinish bere alady. Bul talap mádenıet salasynyń ózin-ózi jumyspen qamtyǵan qatysýshylaryna qoljetimdi.
Joldama alǵan ótinish berýshilerdiń tólem qabiletin anyqtaý úshin 15 jumys kúni ishinde «Otbasy banki» AQ kez kelgen qyzmet kórsetý ortalyǵyna habarlasady. Byltyr atalǵan baǵdarlamaǵa 9 741 ótinish túsip,
1 019 jas otbasy baspanaly bolý baqytyna ıe boldy.
ALMATY
